INTERACT Online proqramı uğurla başa çatıb
Bakı, 17 iyul, AZƏRTAC
Mədəniyyət Nazirliyinin və İctimai Televiziyanın (İTV) dəstəyi ilə “Debüt” film studiyası tərəfindən iyunun 16-dan başlayan uzunmüddətli INTERACT tədris laboratoriyasının ilk mərhələsi olan INTERACT Online proqramı uğurla başa çatıb.
Nazirlikdən AZƏRTAC-a bildirilib ki, interaktiv formatda baş tutan 9 ustad dərsində ümumilikdə 17-dən çox təlim saatı ərzində 900-dən artıq dinləyici film sənayesinin beynəlxalq peşəkarlarına suallarını ünvanlayıb.
Tədris laboratoriyası funksiyasını həyata keçirən INTERACT layihəsinin məqsədi Azərbaycanda kino sahəsində təhsil alan tələbələr, həmçinin yeni fəaliyyətə başlayan kinematoqrafçıları təlim, prodakşn və post-prodakşn, distribusiya və maliyyələşdirmə imkanları ilə təmin etməkdən ibarətdir.
INTERACT Online proqramının mühazirəçiləri sırasında kino sənayesinin tanınmış simaları yer alıb.
Qeyd edək ki, INTERACT layihəsinin vorkşoplar və digər tədbirlərdən ibarət olacaq növbəti mərhələlərinin keçirilmə formatı və statusu COVID-19 pandemiyasının vəziyyətindən asılı olaraq yenilənəcək.
Bölmənin digər xəbərləri
