İNVESTİSİYA FƏALİYYƏTİNİN TƏŞVİQİ ÜZRƏ ƏLAVƏ TƏDBİRLƏR HAQQINDA
AZƏRBAYCAN RESPUBLİKASI PREZİDENTİNİN SƏRƏNCAMI
Azərbaycan xalqının ümummilli lideri Heydər Əliyev tərəfindən əsası qoyulmuş neft strategiyasının ardıcıl həyata keçirilməsi nəticəsində ölkənin valyuta ehtiyatlarının sürətlə artması, həmin vəsaitdən qeyri-neft sahələrinin inkişafına istifadə edilməsi və bu sahələrə xarici investisiyaların daha çox cəlb edilməsi üçün yeni imkanlar açır. Bu isə, öz növbəsində, yeni iş yerlərinin açılmasını təmin etməklə iqtisadiyyatın hərtərəfli inkişafına və əhalinin həyat şəraitinin daha da yaxşılaşmasına xidmət edir.
“Azərbaycan Respublikasının 2006-cı il dövlət büdcəsi haqqında” Azərbaycan Respublikasının Qanununa və Azərbaycan Respublikası Prezidentinin 2004-cü il 27 sentyabr tarixli 128 nömrəli Fərmanı ilə təsdiq edilmiş “Neft və qaz gəlirlərinin idarə olunması üzrə uzunmüddətli strategiya”ya uyğun olaraq iqtisadiyyatın qeyri-neft sahələrinin inkişafına, bu sahələrdə mövcud müəssisələrin maddi və texnoloji bazasının yeniləşdirilməsinə investisiya qoyuluşunun təşviqi məqsədi ilə qərara alıram:
1. “Azərbaycan İnvestisiya Şirkəti” Açıq Səhmdar Cəmiyyəti (bundan sonra – Şirkət) yaradılsın.
2. Müəyyən edilsin ki:
2.1. Şirkətin ilkin nizamnamə kapitalı Azərbaycan Respublikası Dövlət Neft Fondunun vəsaiti hesabına formalaşır;
2.2. Şirkətin investisiya fəaliyyətinin məqsədini, əsasən, ölkə iqtisadiyyatının qeyri-neft sahələrində fəaliyyət göstərən səhmdar cəmiyyətlərinin və digər kommersiya təşkilatlarının nizamnamə kapitalındakı iştirak payını, o cümlədən səhmlərini almaqla müddətli investisiya qoyuluşunun həyata keçirilməsi təşkil edir;
2.3. Şirkətin investisiya fəaliyyəti aşağıdakı prinsiplərə əsaslanır:
2.3.1. Şirkətin fəaliyyət göstərən və ya yeni təsis edilən kommersiya təşkilatlarının nizamnamə kapitalına investisiya qoyuluşu barədə qərarı iştirak payı təklif edilən təşkilatın fəaliyyətinin kommersiya səmərəliliyini əks etdirən biznes-planlarının təhlili və həmin təşkilatın təsisçilərinin, habelə digər iştirakçılarının sahibkarlıq fəaliyyəti sahəsində malik olduğu təcrübə və əldə etdiyi nailiyyətlərin nəzərə alınması əsasında qəbul edilir;
2.3.2. Şirkət investisiya qoyduğu kommersiya təşkilatının nizamnamə kapitalında üstün iştiraka malik olmamalıdır;
2.3.3. Şirkət kommersiya təşkilatları ilə investisiya qoyuluşu haqqında müqavilələr bağlayarkən, bu müqavilələrə Şirkətin kommersiya təşkilatlarının idarəetmə orqanlarında (ümumi yığıncaq, direktorlar şurası (müşahidə şurası)) iştirak etmə və həmin orqanlar tərəfindən qəbul edilən qərarların qüvvəyə minməməsi ilə nəticələnən etiraz etmə (veto) hüququna malik olması barədə şərt daxil edilməlidir;
2.3.4. Kommersiya təşkilatının nizamnamə kapitalına qoyulan investisiya üçün şirkətin ali idarəetmə orqanının müəyyən etdiyi müddət bitdikdə, Şirkət əldə etdiyi iştirak payını bazar qiymətləri ilə sataraq, kommersiya təşkilatındakı iştirakına xitam verir.
2.4. Şirkət fəaliyyətinin genişləndirilməsini və investisiyaların həcminin artırılmasını əlavə səhm, istiqrazlar buraxmaq və ya kreditlər cəlb etməklə təmin edə bilər.
2.5. Şirkətin dövlətə məxsus səhmlərinin saxlanılmasını və idarə olunmasını Azərbaycan Respublikasının İqtisadi İnkişaf Nazirliyi həyata keçirir, həmin səhmlər üzrə dividendlər isə Azərbaycan Respublikasının Dövlət Neft Fonduna köçürülür.
2.6. Şirkətin səhmləri tam həcmdə dövlətə məxsus olan müddətdə onun ali idarəetmə orqanının səlahiyyətləri (Şirkətin ləğv edilməsi və yenidən təşkil olunması istisna edilməklə) onun Müşahidə Şurası tərəfindən həyata keçirilir.
2.7. Şirkətin fəaliyyətinə cari rəhbərliyi (menecmenti) onun Müşahidə Şurası tərəfindən təyin edilən İcraçı direktor həyata keçirir.
3. Şirkətin Müşahidə Şurası aşağıdakı tərkibdə təsdiq edilsin:
Sədr:
Heydər Babayev - Azərbaycan Respublikasının iqtisadi inkişaf naziri
Sədr müavini:
Samir Şərifov - Azərbaycan Respublikası Dövlət Neft Fondunun icraçı direktoru
Üzvlər:
İlqar Fətizadə - Azərbaycan Respublikası maliyyə nazirinin 1-ci müavini
Rüstəm Şahbazov - Azərbaycan Respublikası Dövlət Əmlakının İdarə Edilməsi üzrə Dövlət Komitəsi sədrinin müavini
Şahmar Mövsümov - Azərbaycan Respublikası Milli Bankının baş direktoru
4. Müşahidə Şurasına tapşırılsın ki, bir ay müddətində Şirkətin nizamnaməsini hazırlayıb təsdiq etsin, dövlət qeydiyyatına alınması və fəaliyyətə başlaması üçün qanunvericiliklə nəzərdə tutulmuş tədbirlərin həyata keçirilməsini təşkil etsin və bu barədə Azərbaycan Respublikasının Prezidentinə məlumat versin.
5. Azərbaycan Respublikasının Ədliyyə Nazirliyinə, Azərbaycan Respublikasının İqtisadi İnkişaf Nazirliyinə, Azərbaycan Respublikasının Vergilər Nazirliyinə, Azərbaycan Respublikasının Dövlət Statistika Komitəsinə, Azərbaycan Respublikasının Prezidenti yanında Qiymətli Kağızlar üzrə Dövlət Komitəsinə, Azərbaycan Respublikasının Dövlət Əmlakının İdarə Edilməsi üzrə Dövlət Komitəsinə və Azərbaycan Respublikasının Dövlət Neft Fonduna tapşırılsın ki, Şirkətin dövlət qeydiyyatına alınması və fəaliyyətə başlaması ilə əlaqədar öz səlahiyyətləri daxilində qanunvericiliklə nəzərdə tutulmuş tədbirlərin görülməsini təmin etsinlər.
6. Azərbaycan Respublikasının Nazirlər Kabineti bu Sərəncamdan irəli gələn digər məsələləri həll etsin.
7. Bu Sərəncam imzalandığı gündən qüvvəyə minir.
İlham Əliyev
Azərbaycan Respublikasının Prezidenti
Bakı şəhəri, 30 mart 2006-cı il.
Bölmənin digər xəbərləri
