İordaniya mətbuatı Azərbaycanın Respublika Günündən bəhs etmişdir
Əmman, 2 iyun (AZƏRTAC). Azərbaycanın milli bayramı - Respublika Günü münasibətilə İordaniyanın aparıcı “Əl-Diyar”, “Əl-Dustur” və “The Jordan Times” qəzetlərində məqalələr dərc edilmişdir.
Yazılarda qeyd edilir ki, mayın 28-də Azərbaycanın Əmmandakı səfirliyi tərəfindən Respublika Gününə həsr edilmiş tədbirdə bir çox qonaqlarla yanaşı, İordaniya Senatının sədri Əbdülrauf al-Ravabdeh, parlamentin Aşağı Palatasının spikeri Atef al-Taravneh, Senatın sabiq sədri Taher al-Masri iştirak etmişlər.
Məqalələrdə bildirilir ki, tədbir zamanı səfir Sabir Ağabəyov Azərbaycan-İordaniya ikitərəfli əlaqələrinin inkişaf səviyyəsindən məmnunluğunu ifadə edərək, iki ölkə arasında müxtəlif sahələri əhatə edən 40-dək sazişin imzalandığını söyləmiş, ölkələrimiz arasında münasibətlərin inkişafında parlamentlərarası əməkdaşlığın xüsusi rol oynadığını diqqətə çatdırmışdır.
Azərbaycanlı diplomat hər iki ölkənin dövlət rəhbərləri və xalqları arasında münasibətlərin inkişafında ikitərəfli səfərlərin əhəmiyyətini qeyd etmişdir. Daha sonra Sabir Ağabəyov Əmmanda yerləşən Heydər Əliyev prospektində eyniadlı meydanın və fəvvarənin açılışına göstərdiyi dəstəyə və əməkdaşlığa görə Böyük Əmman Bələdiyyəsinə təşəkkürünü bildirmişdir.
Sonda azərbaycanlı səfir Ermənistan-Azərbaycan, Dağlıq Qarabağ münaqişəsinin sülh yolu ilə həllində göstərdikləri səylərə və dəstəyə görə İordaniya rəhbərliyinə minnətdarlığını ifadə etmişdir.
Asya Hacızadə
AZƏRTAC-ın xüsusi müxbiri
Əmman
Bölmənin digər xəbərləri
