İqlim dəyişikliyi gəmilərin Panama kanalından keçməsini çətinləşdirib
Bakı, 2 noyabr, AZƏRTAC
İqlim böhranı gəmiçiliyə də mənfi təsir göstərir. Quraqlıq səbəbindən Panama kanalından gəmi keçidlərinin sayı iki dəfədən çox azalıb.
AZƏRTAC xəbər verir ki, Panama Kanalı Administrasiyasının məlumatına görə, görülən bütün tədbirlərə baxmayaraq, süni Qatun gölünün səviyyəsi ilin bu fəsli üçün görünməmiş səviyyəyə enməkdə davam edir. Son aylarda azalan təkcə gəmi keçidlərinin sayı deyil. Gəmilərin kanaldan keçməsinə icazə verilən maksimum su axını da azaldılıb.
Panama kanalında suyun səviyyəsinin aşağı olmasını nəzərə alaraq, bu mühüm su yolu ilə gəmilərin hərəkətində azalma proqnozlaşdırılır. Kanal rəhbərliyinin bildirdiyinə görə, gələn ilin fevralına qədər sifariş edilə bilən gəmi keçidlərinin sayı tədricən gündə 30-dan 18-ə endiriləcək. 1950-ci ildən bəri oktyabr ayında heç vaxt bu il olduğu qədər az yağış yağmayıb. İlin sonuna qədər yağıntının az olacağı gözlənilir.
Kanalın uzunluğu təxminən 80 kilometrdir və Mərkəzi Amerikada Atlantik və Sakit okeanları birləşdirir. Normal vaxtlarda hər il təxminən 14 min gəmi su yolundan keçir. Dünya ticarətinin təxminən altı faizi kanal vasitəsilə həyata keçirilir. Son aylarda yağıntıların azalması və temperaturun yüksəlməsi Panama kanalındakı süni Qatun gölündə suyun səviyyəsinin aşağı düşməsinə səbəb olub və kanalın fəaliyyətinə mənfi təsir edib.
Bölmənin digər xəbərləri
