İQTİSADİ İNKİŞAF NAZİRİ FƏRHAD ƏLİYEVİN ÇIXIŞI
Hörmətli xanımlar və cənablar!
Azərbaycan Respublikasının Baş naziri cənab İlham Əliyevin Gəncəyə səfəri ölkə rəhbərliyinin bu qədim şəhərə, gəncəlilərə, o cümlədən Gəncə zəhmətkeşlərinə olan diqqət və qayğısının əyani təzahürüdür.
Məlum olduğu kimi, zati-aliləri möhtərəm cənab Prezident Heydər Əliyev 2000-ci ilin may və 2002-ci ilin sentyabr aylarında Gəncəyə tarixi səfərlər etmişdir. Xoşbəxtlikdən, mən də həmin səfərlərin iştirakçısı olmuşam. 2000-ci ilin may ayında cənab Prezidentin burada, bu meydanda Gəncə gil-torpaq kombinatının zəhmətkeşləri qarşısında tapşırıq verdi ki, Azərbaycanda alüminium sənayesinin əsasını təşkil edən bu müəssisənin, Sumqayıt alüminium zavodunun və Daşkəsən alunit mədəni idarəsinin bazasında Azərbaycan Alüminium Səhmdar Cəmiyyəti yaradılsın. Həmin tapşırığa əsasən səhmdar cəmiyyəti yaradıldı və Hollandiyanın bir şirkətinə uzunmüddətli idarəetməyə verildi.
İnvestisiya proqramına əsasən Gəncə istehsalat sahəsində mövcud iş yerlərinin bərpası, keçmiş əməkhaqqı və ona bərabər tutulan borcların ödənilməsi, idarəetmə müddətində texnoloji avadanlığın yeniləri ilə əvəz olunması, elektrik stansiyasının bərpası, alunit texnologiyasının yenidən qurulması və eləcə də sosial və ekoloji sahələrdə tədbirlər keçirilməkdədir.
Hazırda Gəncəyə Hindistan və Qvineyadan boksit gətirilir, gil-torpaq istehsalat kombinatında emal olunur. 2003-cü ilin 9 ayı ərzində zavodda 150 min tondan çox alüminium oksidi istehsal olunmuşdur. Bunun bir hissəsi Sumqayıt alüminium zavoduna, qalanı isə Tacikistanın alüminium zavoduna göndərilmişdir. Əvvəlki illərlə müqayisədə bu, üç-dörd dəfə çoxdur. Bu gün Gəncə gil-torpaq sahəsində 2700-ə yaxın işçi çalışır. Müəssisədə orta aylıq əmək haqqı 500 min manatdan yuxarıdır. Bu, keçən illə müqayisədə iki dəfə çoxdur. İndi əsas məqsəd Daşkəsən alunit mədənindən xammal gətirilməklə, Gəncədə alüminium oksid istehsalını bərpa etməkdir. Bundan sonra Daşkəsən və Gəncə şəhərlərində min nəfərdən çox yeni iş yerləri yaradılacaqdır.
Hörmətli cənab Baş nazir, mənə məlumdur ki, cənab Prezident Sizin bölgələrə olan səfərlərinizi, xüsusilə, Gəncə şəhərinə səfərinizə çox böyük əhəmiyyət verir. Mən burada möhtərəm cənab Prezidentimizi və Sizi əmin etmək istərdim ki, dövlətimizin başçısının Gəncə şəhərinə səfərləri zamanı verdiyi tapşırıqlar indiyə qədər olduğu kimi, bundan sonra da yüksək səviyyədə yerinə yetiriləcəkdir.
Cənab Baş nazir, icazənizlə, indi qısa bir müddət ərzində Gəncə şəhərində görülən işlər barədə Sizə məlumat vermək istərdim. Sözsüz ki, Siz bir il bundan əvvəl Gəncədə olmuşdunuz. Gəncə Şəhər İcra Hakimiyyətinin və gəncəlilərin şəhərdə apardıqları abadlıq işlərini özünüz gördünüz. İndi isə digər işlər barədə ətraflı məlumat vermək istərdim.
Gəncə şəhərinin elektrik enerjisi ilə təchizatının yaxşılaşdırılması məqsədi ilə 50-dən çox yeni transformator quraşdırılmış, hər biri 30 kilometr uzunluğunda olan 110 kilovoltluq birinci və ikinci Yenikənd -Gəncə xətləri istismara verilmişdir. Qaz təminatının yaxşılaşdırılması ilə əlaqədar cənab Prezidentin verdiyi tapşırıqdan sonra, - o zaman abonentlərin sayı 5 min idi, - Gəncədə 54 min abonentə qaz çəkildi və indi təxminən 60 minə yaxın mənzildə qaz vardır.
Məlumdur ki, Gəncə şəhərinin su təchizatında və kanalizasiya sistemlərində problemlər mövcuddur. Bu problemləri həll etmək üçün Almaniya Federativ Respublikasının hökuməti ilə müvafiq danışıqlar aparılmış və Gəncə şəhərinin su təchizatının və kanalizasiya sisteminin yenidən qurulmasına 42 milyon avro məbləğində kredit ayrılmışdır.
Beynəlxalq maliyyə təsisatları tərəfindən maliyyələşdirilən, uzunluğu 94 kilometr olan Gəncə-Qazax avtomobil yolunun yenidən qurulmasına 48 milyon ABŞ dolları, 142 kilometrlik Gəncə-Ucar avtomobil yolunun yenidən qurulmasına 81 milyon ABŞ dolları məbləğində vəsait artıq ayrılmışdır. 2004-cü ilin əvvəlindən bərpa işlərinə başlanması nəzərdə tutulur.
Gəncə şəhərində rabitə xidmətinin keyfiyyəti yaxşılaşmış, telefon nömrələrinin sayı təxminən iki dəfə artırılmışdır. Bütün abunəçilər İnternetə qoşulmaq imkanı əldə etmişlər.
Gəncə şəhərinin inkişafı üçün ən vacib məsələ mövcud müəssisələrin fəaliyyətinin bərpa olunması və yeni müəssisələrin açılmasıdır. İndi “Gəncə Şərab-2”, “Gəncə Qənnadı”, “Gəncə Çörək”, “Gəncə Pambıqəyirici”, “Gəncə Əlvan Metal” Səhmdar Cəmiyyətləri və bir sıra başqa müəssisələr öz fəaliyyətini tamamilə yenidən qurmuşdur və çox uğurla işləyirlər.
Son bir il ərzində Sahibkarlığa Kömək Milli Fondundan özəl sektorun inkişafı məqsədi ilə Gəncənin müxtəlif şirkətlərinə özəl banklar vasitəsilə 2 milyard manat məbləğində kredit verilmiş və nəticədə 700-dən çox yeni iş yerləri yaradılmışdır.
Hörmətli cənab Baş nazir, sizi əmin etmək istərdim ki, biz bu nailiyyətlərlə kifayətlənməyəcək, iqtisadiyyatın bütün sahələrində işlərimizi davam etdirəcəyik.
Hörmətli görüş iştirakçıları, hamıya məlumdur ki, oktyabrın 15-i prezident seçkiləri günüdür. Ölkəmizin hər bir vətəndaşı üçün bu, əlamətdar bir gündür. Mən əminəm ki, bütün gəncəlilər iqtisadi inkişafı, sabitliyi, əmin-amanlığı, əhalinin maddi rifahının yaxşılaşmasını və dövlətimizin qüdrətlənməsini dəstəkləyərək, seçkilərdə fəallıq göstərəcək, ən layiqli namizədə səs verəcəklər.
Bölmənin digər xəbərləri
