İQTİSADİ İNKİŞAF NAZİRİ HEYDƏR BABAYEVİN ÇIXIŞI
-Bu il Heydər Əliyev adına Bakı-Tbilisi-Ceyhan neft kəmərinin və Cənubi Qafqaz qaz kəmərinin istifadəyə verilməsi, bunun müqabilində yaxın illərdə gəlirlərin əhəmiyyətli dərəcədə artacağı ölkəmizin davamlı inkişafı üçün əlverişli zəmin yaradır. İqtisadiyyatın lokomotivi olan neft-qaz sektorundakı yüksəliş, öz növbəsində, digər istehsal sahələrinə də müsbət təsirini göstərib və bu ilin birinci rübündə sənaye məhsulunun ümumi artımı 47,4 faiz təşkil etmişdir. Sənayenin qeyri-neft sahələrində - kimya, metallurgiya sənayesinin və mebel məhsullarının artımını xüsusilə qeyd etmək istərdim.
Bu ilin ilk üç ayında aqrar sektorda artım 2,5 faiz təşkil etmişdir. Ümumi daxili məhsulda böyük xüsusi çəkiyə malik olan xidmət sahəsində son illərdə ciddi yüksəliş müşahidə olunur. Bu, bir tərəfdən, istehsalın inkişafı ilə bağlıdırsa, digər tərəfdən, əhalinin maliyyə imkanlarının yaxşılaşmasından xəbər verir. Bu ilin birinci rübündə ötən ilin müvafiq dövrü ilə müqayisədə yük daşımaları 10,7 faiz, rabitə xidmətləri 28,4 faiz, əhaliyə göstərilən pullu xidmətlərin həcmi 28,8 faiz artmışdır.
Ölkəmizin maliyyə imkanlarının genişlənməsi, investisiya mühitinin daha da yaxşılaşması ilə bağlı görülən tədbirlər investisiya qoyuluşunun artmasına müsbət təsir göstərməkdədir. Hesabat dövründə əsas kapitala yönəldilən investisiyalar təxminən 7 faiz artmışdır. Burada əhəmiyyətli məqam ondan ibarətdir ki, ötən ilin müvafiq dövrü ilə müqayisədə, qeyri-neft sahələrinə investisiya qoyuluşunun həcmi 36 faiz, o cümlədən daxili investisiyaların həcmi 42 faiz artmışdır. Ölkə başçısının Sərəncamı ilə Dövlət İnvestisiya Şirkətinin yaradılması bu proseslərin daha da sürətləndirilməsinə, qeyri-neft sahələrindəki müəssisələrin dirçəlməsinə, rəqabət qabiliyyətli məhsul istehsalının artırılmasına, yeni iş yerlərinin açılmasına güclü təkan verəcəkdir.
Cənab Prezidentin iqtisadi doktrinasının ən mühüm tərkib hissəsi tarazlı inkişafın təmin edilməsindən ibarətdir. Belə ki, məhz bu cür yanaşma inkişafın davamlılığını təmin edə bilər. Təsadüfi deyil ki, cənab Prezident regionların sosial-iqtisadi inkişafı Dövlət Proqramının icrasına xüsusi diqqət yetirir. Təkcə ötən dörd ay ərzində cənab Prezident Astara, Lənkəran, Ağdam, Tərtər, Bərdə, İmişli, Əli Bayramlı, Balakən, Zaqatala, Qax, Şəki şəhər və rayonlarında olmuş və proqramın icrasının gedişi ilə şəxsən tanış olmuşdur. Belə diqqətin nəticəsidir ki, 2006-cı ilin ötən dövrü ərzində 34 mindən artıq yeni iş yeri yaradılmışdır.
Ötən illərdə olduğu kimi, bu il də sahibkarlara maliyyə dəstəyi siyasəti davam etdirilir və birinci rübdə 394 sahibkarlıq subyektinə 5,4 milyon manat məbləğində güzəştli kredit verilmişdir. Bunun müqabilində 1500-ə yaxın yeni iş yerinin yaradılması nəzərdə tutulmuşdur.
Ölkəmizin iqtisadi qüdrəti və maliyyə imkanları möhkəmləndikcə, əhalinin həyat səviyyəsinin yüksəldilməsi üçün əlverişli zəmin yaranır, minimum əmək haqqı və pensiya və müavinətlər davamlı olaraq artırılır. Bu ilin birinci rübündə də orta aylıq əmək haqqı 20 faiz, əhalinin pul gəlirləri 19 faiz artmışdır.
Məlum olduğu kimi, Azərbaycan dövlətinin sosial-iqtisadi siyasətinin ən mühüm istiqamətlərindən biri ölkəmizin dünya iqtisadi sisteminə inteqrasiyasının sürətləndirilməsindən, ticarət əlaqələrinin genişləndirilməsindən ibarətdir. Hesabat dövründə xarici ticarət dövriyyəsi 21 faiz, o cümlədən ixrac iki dəfədən çox artmışdır. Ötən illərdə olduğu kimi, xarici ticarətdə müsbət keyfiyyət dəyişiklikləri davam etmiş, qeyri-neft məhsullarının ixracı 2005-ci illə müqayisədə 49 faiz artmışdır.
Nazir ölkəmizdə və kənarda sahibkarların iştirakı ilə keçirilən iqtisadi forumların əhəmiyyəti, iqtisadi qanunvericiliyin bazasının təkmilləşdirilməsi, 2007-2010-cu illər üçün Dövlət İnvestisiya Proqramı layihəsinin hazırlanması, kommunal sistemdə iqtisadi cəhətdən əsaslandırılmış tariflərin müəyyən edilməsi və digər aktual məsələlər barədə məlumat verdi.
Bölmənin digər xəbərləri
