İRAN PARTİYALARI ÖLKƏNİN İNDİKİ PREZİDENTİNİ BMT-NİN BAŞ KATİBİ VƏZİFƏSİNƏ NAMİZƏD GÖSTƏRMƏK İSTƏYİRLƏR
İranın partiyalararası koalisiyasının rəhbəri Həsən Qafurifərd bildirmişdir ki, ölkənin müxtəlif siyasi partiyaları BMT-nin Baş katibi vəzifəsinə Məhəmməd Xatəminin namizədliyini irəli sürmək təşəbbüsünü tamamilə dəstəkləyirlər. Onun sözlərinə görə, bu yaxınlarda Pekində keçirilən “Asiya partiyaları” konfransında İranın nümayəndə heyəti qarşıdakı dövr üçün BMT-nin lideri vəzifəsinə Xatəminin namizədliyini təklif etmişdir.
H.Qafurifərd demişdir: “Təklifimizi yaxın vaxtlarda prezident Xatəmiyə təqdim edəcəyik və onun razılığını alsaq, təşəbbüsümüzü həyata keçirmək üçün xüsusi komitə yaradacağıq”.
Xatırladaq ki, Məhəmməd Xatəminin prezidentlik müddəti gələn ilin yayında bitir. İran qanunvericiliyinə uyğun olaraq, o, yenidən ölkə prezidenti seçilə bilməz. BMT-nin yeni baş katibi də təxminən həmin dövrdə seçiləcəkdir. Hamılıqla qəbul edilmiş qaydaya görə, BMT-nin növbəti rəhbəri Asiya ölkələrindən birinin nümayəndəsi olmalıdır.
Bölmənin digər xəbərləri
