İslandiya hakimiyyəti ölkənin turistlər üçün açılacağı tarixi elan edib
Bakı, 14 may, AZƏRTAC
İslandiya hakimiyyəti iyunun 15-dən gec olmayaraq ölkəni turistlər üçün açmağı planlaşdırır.
AZƏRTAC “Forbes” nəşrinə istinadla xəbər verir ki, bu barədə İslandiyanın Baş Naziri Katrin Yakobsdouttir bildirib.
Baş Nazirin sözlərinə görə, ölkəyə daxil olan insanlar üçün ikihəftəlik karantin ləğv ediləcək, lakin onlar koronavirusa görə analiz verməli olacaqlar. Testlərin nəticələri elə həmin gün bilinəcək.
Səyahətçilər üçün ən əsas problem isə marşrutlardır. Belə ki, aviakompaniyaların əksəriyyəti uçuşları dayandırıb və reysləri iyul ayından tez bərpa etməyi planlaşdırmırlar. Hələlik İslandiyaya yalnız Boston, London və Stokholmdan gəlmək olur.
Qeyd edək ki, martın 11-də Dünya Səhiyyə Təşkilatı COVID-19 virusunun yayılmasını pandemiya elan edib. Pandemiyanın statistikasını aparan Worldometers saytının Bakı vaxtı ilə bu gün saat 14:40-a olan məlumatına əsasən, İslandiyada 1800-dən çox insan koronavirusa yoluxub, 10 nəfər isə həyatını itirib. Hazırda ölkədə cəmi 12 nəfər aktiv koronavirus xəstəsi var.
Bölmənin digər xəbərləri
