İSRAİL HƏBSXANALARINDA ƏRƏB MƏHBUSLARA 70 NÖV İŞGƏNCƏ VERİLİR

18.09.2004 [21:46]
Çap et
A⁺ A^-

AZƏRTAC xəbər verir ki, “Əl-kifah əl-Ərəb” jurnalı Ərəb Dövlətləri Birliyinin apardığı tədqiqatın nəticələrinə istinadla yazır ki, İsrail həbsxanalarında ərəb məhbuslar 70 növdən çox işgəncələrə məruz qalırlar.

Sənəddə deyilir ki, israillilərin tətbiq etdikləri işgəncələrin əksəriyyəti cismani əzablardan ibarətdir. Məhbuslara elektrik cərəyanı ilə, odla işgəncələr verir, başlarını və cinsiyyət orqanlarını sıxır, ayaqyoluna getməyə qoymur, üstlərinə qışda soyuq, yayda isə qaynar su tökür, qışda yatarkən üstlərini örtməyi qadağan edirlər. Çox vaxt işgəncələr ölümlə nəticələnir.

Bundan əlavə, İsrail zindanlarındakı fələstinli məhbuslar daim mənəvi təhqirə, bir növ, mənəvi işgəncələrə məruz qalırlar. Onları uzun müddət yatmağa qoymur, ayaq üstə dayanmağa məcbur edir, üzlərinə tüpürür, söyür, birnəfərlik kameraya salır, doğmalarını həbsə almaqla hədələyirlər.

Sənəddə bildirilir ki, kişilərə, qadınlara və uşaqlara eyni dərəcədə işgəncələr verilir. Məsələn, məhbus qadınları görüş otağına gəlməzdən əvvəl lüt soyunmağa məcbur edir, buna tabe olmayanları birnəfərlik kameralara salırlar.

Hazırda İsrail həbsxanalarında 8 min ərəb məhbus var ki, onların da 474-ü uşaqlardır.