İSRAİL RUSİYADAN RAUL VALLENBERQİN TALEYİ HAQQINDA HƏQİQƏTİ AÇIQLAMAĞI TƏLƏB EDƏCƏK
İsrail Prezidenti Moşe Katsav bildirmişdir ki, onun ölkəsi və İsveç Raul Vallenberqin taleyi barədə məlumat toplamaq üçün bütün mümkün işləri görməlidir. O söz vermişdir ki, mayda Moskvaya səfəri zamanı Prezident Vladimir Putinlə görüşündə bu mövzuya toxunacaqdır.
AZƏRTAC xəbər verir ki, “Ceruzalem post” qəzetinin yazdığına görə, M.Katsav Vallenberqin İsveçdən gələn yaxın qohumlarına demişdir ki, onların əmisinin taleyi haqqında Rusiya arxivlərindəki informasiyanın üzə çıxarılmaması üçün Rusiya tərəfinin heç bir əsası yoxdur. O bildirmişdir ki, İkinci Dünya müharibəsi illərində 100 min Macarıstan yəhudisini nasistlərdən xilas edən isveçli diplomat Raul Vallenberqin niyə, harada və nə zaman öldürüldüyü barədə həqiqəti ictimaiyyətə söyləməyin vaxtı çatmışdır.
1963-cü ildə R.Vallenberq “xalqlar arasında haqq-ədalət carçısı”, habelə İsrailin fəxri vətəndaşı elan edilmişdir. İsrail orta məktəb üçün tarix dərsliyinə R.Vallenberqin taleyi haqqında ayrıca hissə daxil etməyi qərara almışdır.
Rusiya etiraf etmişdir ki, Raul Vallenberq iki il DTK-nın həbsxanasında saxlanılmış və 1947-ci ildə öldürülmüşdür.
Bölmənin digər xəbərləri
