İSTANBUL BÖYÜK ŞƏHƏR BƏLƏDİYYƏSİNİN SƏDRİ QƏDİR TOPBAŞIN ÇIXIŞI
Xarici işlər naziri və Baş nazirin müavini və dövlət nazirimiz,
Millət vəkillərimiz, yerli administrasiya rəhbərlərimiz və bələdiyyə sədrlərimiz,
Mətbuatımızın dəyərli nümayəndələri, İstanbulun gözəl insanları, hörmətli qonaqlar!
Hamınızı bu mənalı gündə sevgi və hörmətlə salamlayıram. Napoleonun dediyi kimi, dünya tək bir dövlət olsaydı, paytaxt İstanbul olardı. Tarixin, mədəniyyətlərin, qitələrin qovuşduğu bir şəhərdə qardaşcasına bir araya gəldik. Bunun üçün şükür edirik. Hazırda biz Avropanın başlanğıc nöqtəsindəyik. Qarşı tərəf isə Asiyanın başlanğıc nöqtəsidir. İstanbul elə bir şəhərdir ki, burada hər gün günəş iki qitəyə birdən doğur. Bu şəhər belə bir gözəl gün yaşayır. 4500 illik tarixə malik, üç böyük mədəniyyətin, imperatorluğun idarəetmə mərkəzi olmuş bir şəhərdəyik. Belə gözəl bir şəhərdə dost və qardaş ölkənin mərhum Cümhurbaşqanı, çox hörmətli Heydər Əliyevin adını daşıyan bu park böyük məna daşıyır. Bələdiyyə başqanları olaraq, biz şəhərimizin gözəlləşməsinə xüsusilə böyük önəm veririk. Burada vətəndaşlarımız, insanlarımız asudə vaxtlarını səmərəli keçirəcəklər. Bu məqsədlə Sarıyer bələdiyyə başqanının köməyi ilə bu məkan yaradıldı. 2004-cü ilin oktyabr ayında bələdiyyə məclisimiz çox hörmətli Heydər Əliyevin adına bu parkın yaradılması və İstanbulun mərkəzində bir küçəyə Heydər Əliyevin adının verilməsi barədə qərar qəbul etdi. İnsanlar var ki, gəlib gedərlər, insanlar da var ki, tarixə düşürlər, xeyirxah əməlləri ilə yaddaşlarda yaşayırlar və başqaları üçün örnək olurlar. Heydər Əliyev də belə bir şəxsiyyətdir. Azərbaycan müstəqillik qazandıqdan sonra mən həmişə televiziyanı izləyərdim və xüsusilə Heydər Əliyevin çıxışlarına, mətbuat konfranslarına diqqətlə baxardım. Milli sərvətlərdən ölkənin inkişafı üçün necə istifadə etdiyini, bunu vətəndaşlara necə anlatdığını görürdüm. O, əvəzolunmaz bir şəxsiyyət, dünyada yetişmiş nadir şəxsiyyətlərdən biridir. Belə bir millətə mənsub olmağımızdan qürur duyduğumuzu bir daha ifadə edirəm.
Bu gün hamımız üçün çox önəmlidir. Yeni bir tarixi hadisəyə şahidlik edirik, birlikdə imza atırıq. Gələcək nəsillərimiz bu tarixi anları heç vaxt unutmadan, bir millət, iki dövlət ruhunun burada daim yaşayacağını görəcəklər. Bütün bu işlərdə əməyi olan hər kəsə təşəkkür edirəm. Bu gözəllik, bu qardaşlıq dünya durduqca davam edəcəkdir. Hamınıza çox sağ olun deyirəm.
Bölmənin digər xəbərləri
