İSTANBULDA BEYNƏLXALQ İSLAM MALİYYƏ FORUMU KEÇİRİLƏCƏK

14.09.2004 [13:06]
Çap et
A⁺ A^-

AZƏRTAC Müstəqil İslam İnformasiya Agentliyinə istinadla xəbər verir ki, sentyabrın 27-29-da İstanbulda beynəlxalq islam maliyyə forumu keçiriləcəkdir. İldə iki bir dəfə keçirilən bu forumun sponsoru ərəb dünyasında ən iri bank olan Səudiyyə Ərəbistanının Milli Kommersiya Bankıdır.

Tədbirdə 50 ölkədən təkcə maliyyə sahəsində çalışan iri biznesmenlər deyil, həm də müsəlman hüququ sahəsində görkəmli mütəxəssislər iştirak edəcəklər.

Bu gün islam maliyyəsi sahəsində dövriyyədə milyardlarla dollar var. Fond və maliyyə bazarlarında maliyyə vasitələri və xidmətlərinin yeni-yeni növləri geniş vüsət alır. Bu inkişaf sayəsində Yaxın Şərqdən və Fars körfəzi bölgəsindən kapitalın Qərb ölkələrinə axınının qarşısını almaq mümkün olmuşdur. Məsələn, ötən əsrin 70-ci illərində “qara qızıl” satışından əldə edilən mənfəətin əksər hissəsi Qərb ölkələrinin, ilk növbədə, Birləşmiş Ştatların banklarına qoyulurdusa, indi bu pullar regionda qalır.

Ən cüzi hesablamalara görə, Fars körfəzi ölkələrində özəl kapitalın ümumi məbləği 1,5 trilyon dollar təşkil edir ki, onun da 250 milyardı islam maliyyə qurumları tərəfindən idarə olunur, 400 milyardı isə beynəlxalq banklara qoyulmuşdur.

Forum Türkiyədə keçirildiyinə görə, bu ölkədə islam banklarının inkişafı məsələsi də müzakirə ediləcəkdir.