İstanbulda güclü külək bir nəfərin ölümünə səbəb olub
İstanbul, 29 noyabr, AZƏRTAC
İstanbulda hökm sürən kəskin hava şəraiti səbəbindən bir nəfər ölüb, çox sayda tikili zərər görüb.
AZƏRTAC xəbər verir ki, İstanbul valiliyi şəhərdə güclü külək və leysanın son 24 saat ərzində yaratdığı fəsadlarla bağlı məlumat yayıb. Bildirilib ki, küləyin aşırdığı elektrik dirəyinin altında qalan bir nəfər həyatını itirib.
İstanbul və Bursada dəniz səfərləri təxirə salınıb. Bosfor boğazında gəmilərin hərəkəti dayandırılıb. Külək ümumilikdə 27 tikilinin dam örtüyünü uçurub, 43 ağac kökündən qopub, bir ərazidə torpaq sürüşməsi qeydə alınıb. Qabaqlayıcı tədbirlər çərçivəsində üç bina boşaldılıb.
Şəhərin Zeytinburnu sahilində “Kadriye Ana” adlı yük gəmisi quruya oturub. Gəmi heyəti təxliyə edilib.
Qeyd edək ki, İstanbul və Sabiha Gökçen hava limanlarında təyyarələrin uçuş cədvəlində dəyişiklik yoxdur.
Bölmənin digər xəbərləri
