İsveçin 600 vətəndaşı İnterpol tərəfindən axtarışa verilib
Stokholm, 12 oktyabr, Nərgiz Cəfərli, AZƏRTAC
Maliyyə fırıldağından tutmuş uşaq oğurluğuna qədər müxtəlif cinayətlərdə şübhəli bilinən 600-ə yaxın İsveç vətəndaşı “qırmızı vərəqə” ilə EUROPOL və İnterpol tərəfindən axtarışa verilib.
AZƏRTAC İsveç polisinə istinadla xəbər verir ki, axtarışda olanların altıda birinin cinayət əməli mütəşəkkil cinayətkarlıqla bağlıdır.
Polis Departamenti Milli Əməliyyatlar Direktorluğunun rəhbəri Hokan Vallın sözlərinə görə, polisin beynəlxalq axtarışa başlaması üçün bir şəxs cinayət törətməkdə əsaslı şəkildə şübhəli bilinməli və ya müstəntiqlərin uzun müddət istintaq aparmasını tələb edən qiyabi həbs qərarı olmalıdır. Yəni, xaricdə gizlənən cinayətkarların sayı artıq barələrində həbs qətimkan tədbiri seçilmiş şəxslərdən xeyli çoxdur.
İsveç polisinin məlumatına görə, hər həftə axtarışda olan ən azı bir isveçli tapılır. Lakin bu, heç də həmişə onların İsveçə ekstradisiya ediləcəyi demək deyil, çünki saxlandıqları ölkənin vətəndaşlığı onlara güclü hüquqi müdafiə təmin edir. Vall bu vəziyyəti belə izah edir: “Bu, olduqca təbiidir. Biz İsveçdə də öz vətəndaşlarımızı çox diqqətli araşdırma aparmadan üçüncü ölkələrə ekstradisiya etmirik”.
Bölmənin digər xəbərləri
