İsveçli rəssamın qırmızı evi Aya göndəriləcək
Stokholm, 9 yanvar, Nərgiz Cəfərli, AZƏRTAC
İsveçli rəssam Mikael Genberg 25 ildir üzərində çalışdığı arzusunu reallaşdırmağa hazırlaşır: ağ bəzəkli qırmızı ev Ayda qurulacaq.
AZƏRTAC xəbər verir ki, layihə Yaponiyanın “Ispace” kosmik şirkəti və ictimaiyyətin dəstəyi sayəsində reallığa çevriləcək. Layihəni hazırlayan “The Moonhouse” şirkətinin 70 ortaq sahibi arasında isveçli astronavt Krister Fuglesang da var.
İlk öncə ev insanın yaşaması üçün kifayət qədər böyük olmalı idi. Amma “Ispace”in tələbi o idi ki, konstruksiyanın çəkisi 100 qramdan çox olmamalıdır: indi evcik cəmi 11 sm enliyində və 8 sm hündürlüyündədir. Evcik kosmos səyahətlərinin ciddi tələblərinə cavab verən xüsusi keramika boyası ilə boyanmışdır.
Genberg bu layihədə dərin simvolizm görür. Qırmızı evcik rahatlıq və təhlükəsizlik ilə əlaqələndirilir.
“Ay əslində hər hansı bir insanın olmaq istədiyi bir yer deyil. Bu, rənglərin olmadığı ölü, boş yerdir. “Evcik ancaq Aya bağlandıqda sənət əsərinə çevrilir”, - deyə Genberg qeyd edir.
Missiyaya startın verilməsi 2025-ci il yanvarın 15-20-nə planlaşdırılır.
Bölmənin digər xəbərləri
