İsveçrənin Ukraynaya yardımı döyüş meydanındakı vəziyyətə görə dəyişəcək
Bakı, 11 oktyabr, AZƏRTAC
İsveçrə növbəti dörd il ərzində Ukraynaya 1,5 milyard avro yardım etməyi planlaşdırır. Lakin bu planların həyata keçirilməsi digər məsələlərlə yanaşı, döyüş meydanındakı vəziyyətdən və İsveçrənin maliyyə durumundan da asılı olacaq.
AZƏRTAC xəbər verir ki, bunu İsveçrənin xarici işlər naziri İnyasio Kassis Cenevrədə keçirilən mətbuat konfransında deyib.
“İsveçrə indiyədək müharibədən zərər çəkənlərə dəstək üçün təxminən 500 milyon avro yardım edib. Növbəti dörd il ərzində inkişaf, bərpa və yenidənqurma işlərinə əlavə olaraq 1,5 milyard avro ayıracağıq”, - deyə İnyasio Kassis bildirib.
Nazir, həmçinin İsveçrə hökumətinin 2036-cı ilədək Ukraynaya 5 milyard avro ayırmaq öhdəliyini xatırladıb: “Biz yaxın 12 il ərzində uzunmüddətli yardımdan danışırıq. Lakin bu, ilk növbədə ölkədəki maliyyə vəziyyətindən və döyüş meydanındakı durumdan asılı olacaq”.
Avropa İttifaqının üzvü olmayan İsveçrə neytral statusuna baxmayaraq, Ukraynadakı müharibə ilə əlaqədar Brüsselin Moskvaya qarşı tətbiq etdiyi sanksiyaları dəstəkləyir.
Bölmənin digər xəbərləri
