İTALİYA JURNALİSTİNİ OĞURLAYANLARIN TƏLƏBİ
AZƏRTAC-ın xəbər verdiyi kimi, fevralın 4-də İtaliya jurnalisti Culiana Sqrena Bağdadda oğurlanmışdır. Bunu “İslami cihad” terror təşkilatı öz üzərinə götürmüşdür. Bu barədə müvafiq bəyanat internetdəki İslam saytlarından birində yerləşdirilmişdir.
“İslami cihad” İtaliya hökumətindən İraqdakı qoşunlarını 72 saat ərzində çıxarmağı tələb edir. Lakin bəyanatda jurnalistin öldürüləcəyi barədə hədə-qorxu yoxdur. Sadəcə bildirilir ki, Sqrenanın oğurlanması İtaliya hökumətinə və onun başçısı Silvio Berluskoniyə xəbərdarlıqdır.
S.Berluskoni demişdir ki, İtaliya hökuməti jurnalistin azad edilməsinə danışıqlar yolu ilə nail olmağa çalışır.
İraqda yanvarın 30-da keçirilən parlament seçkilərinədək burada İtaliyanın 7 vətəndaşı oğurlanmışdır. Onlardan bəzilərinin, o cümlədən Simona Parinin və Simona Torrettanın bəxti gətirdi - evə sağ-salamat qayıda bildilər. Lakin digərləri, o cümlədən Entso Baldoni və Salvatore Santoro vətəni daha heç vaxt görməyəcəklər.
O ki qaldı hərbi qulluqçular arasında itkilərə, burda da italyanlar ABŞ və Böyük Britaniyadan sonra üçüncü yeri tuturlar. İndiyədək İraqda 19 italiyalı hərbi qulluqçu həlak olmuşdur.
Bölmənin digər xəbərləri
