İtaliyada qasırğa azı dörd nəfərin ölümünə səbəb olub
Roma, 3 noyabr, AZƏRTAC
Avropada tüğyan edən “Kiaran” qasırğası İtaliyanın şimal regionlarını da cənginə alıb.
AZƏRTAC xəbər verir ki, Toskana, Emiliya-Romaniya və Veneto bölgələrində hökm sürən əlverişsiz hava şəraiti səbəbindən 4 nəfər ölüb, 6 nəfər itkin düşüb.
Leysan yağışları nəticəsində çaylar məcrasından çıxıb, evləri su basıb, magistral yollar su altında qalıb. Təxminən 800 hektar əkin sahəsinə ziyan dəyib, bəzi bölgələrdə daşqın təhlükəsi var. Toskanada 40 min evə elektrik enerjisinin verilişi dayanıb. Mülki müdafiə qüvvələri gecə saatlarından bəri minə yaxın əməliyyat keçirib.
Bir sıra bölgələrdə küləyin sürəti saatda 150 kilometrə çatıb, 200 millimetrədək yağıntı düşüb. Güclü külək ağacları avtomobillərin üzərinə və yollara aşırıb, binaların dam örtüklərini qoparıb. Torpaq sürüşməsi nəticəsində yollar bağlanıb.
Paytaxt Roma sahillərində də güclü külək müşahidə olunur, dalğaların hündürlüyü 3 metri ötüb.
Roma
Bölmənin digər xəbərləri
