İyunun 30-da Beynəlxalq Parlamentarizm Günü qeyd olunur
Bakı, 30 iyun, AZƏRTAC
2018-ci ildə BMT Baş Assambleyası öz qətnaməsində parlamentlərin və parlament təşkilatlarının həm milli səviyyədə, həm də qlobal davamlı inkişaf məqsədlərinə nail olunmasında, həmçinin bütün dünyada insanların həyatının yaxşılaşdırılmasında rolunu vurğulamaq üçün Beynəlxalq Parlamentlərarası İttifaqın (IPU) yaradılmasının ildönümünü ilə əlaqədar Beynəlxalq Parlamentarizm Gününü təsis edib.
AZƏRTAC BMT-nin məlumatına istinadla xəbər verir ki, 2025-ci ildə bu əlamətdar gün “Gender bərabərliyinə nail olmaq” devizi altında qeyd olunur. Təşkilatın müraciətində deyilir: “Qadınlar bütün dünyada milli və yerli parlamentlərdə kifayət qədər təmsil olunmur. Bu isə onların siyasi hüquqlarını, qanunlar və büdcələr üzərində təsirini məhdudlaşdırır. BMT Qadınları siyasət dialoqları və partiyalararası əməkdaşlıq vasitəsilə daha çox qadın liderlərin, dəstəkləyici qanunların və bacarıqların artırılmasının tərəfdarıdır. Beynəlxalq Parlamentlərarası İttifaq (IPU) kimi qruplarla tərəfdaşlıq bu səylərin açarıdır. Onun tərkibində 40 ildən artıqdır fəaliyyət göstərən Qadın Parlamentarilər Forumu qadın deputatlara gender qeyri-bərbərliyi problemini həll etmək səlahiyyətini verir və 2025-ci il bu mövzuya yanaşmanı təcəssüm etdirərək kişiləri müttəfiq kimi əhatə edir. Forum qadınların parlament nümayəndə heyətlərinə daxil olmasını tələb edən qaydaların tətbiqinə kömək edir.”
BMT qeyd edir ki, 1889-cu ildə yaradılmış IPU beynəlxalq əməkdaşlığı inkişaf etdirməyə və münaqişələri müharibədən çox dialoq yolu ilə həll etməyə yönəlmiş ilk siyasi çoxtərəfli təşkilatdır. O, tarixi boyu parlament diplomatiyası üçün əsas platforma olub. Təşkilatın təsirini onun təsisçilərinin və çoxsaylı digər tanınmış üzvlərinin qlobal sülh səylərinə töhfələrini vurğulayaraq Nobel Sülh mükafatına layiq görülməsi faktı da vurğulayır. IPU sülhə sadiqliyi fonunda tərksilah üçün güclü təbliğat aparır, nüvə silahlarından azad dünya üçün fəal lobbiçilik edir və qeyri-dövlət subyektlərinin kütləvi qırğın silahlarına yiyələnməsinin qarşısını almaq məqsədi daşıyan BMT Təhlükəsizlik Şurasının 1540 saylı qətnaməsinin hərtərəfli həyata keçirilməsini dəstəkləyir.
Müharibənin qadınlara və gənclərə qeyri-mütənasib şəkildə təsir etdiyini qəbul edən IPU bu qruplar üçün sülh və təhlükəsizlik məsələlərinə xüsusi diqqət yetirir. Bu diqqət münaqişə vəziyyətlərində qadınların və gənclərin rollarına və müdafiəsinə toxunan BMT Təhlükəsizlik Şurasının 1325 və 2250 saylı qətnamələrini rəhbər tutur.
IPU Qadın Parlamentarilərin Forumu 2025-ci ildə 40 illik yubileyini qeyd edir. O, bu kontekstdə gender bərabərliyini və qadınların siyasətdə təmsil olunmasını inkişaf etdirmiş 40 nüfuzlu qadının töhfələrini təqdir edir. Bu qabaqcıl liderlər Forumun gündəliyinin formalaşmasında, qlobal əməkdaşlığın təşviqində və bütün dünyada qadınların səlahiyyətlərini gücləndirmək üçün qanunvericilik islahatlarının aparılmasında mühüm rol oynayıblar.
Bölmənin digər xəbərləri
