Kanada ABŞ və Meksika ilə ticarət sazişini yenidən nəzərdən keçirməyə hazırlaşır
Bakı, 18 sentyabr, AZƏRTAC
Kanada yaxın vaxtlarda ABŞ və Meksika ilə üçtərəfli azad ticarət sazişi (USMCA) üzrə yeni məsləhətləşmələrə başlayacaq.
AZƏRTAC xəbər verir ki, CBC telekanalı bu barədə Kanadanın qurumlararası münasibətlər naziri və ABŞ-la ticarətə məsul Dominik Leblanın ofisinə istinadla məlumat yayıb. Məlumatda rəsmi məsləhətləşmələrin gələn həftə başlayacağı bildirilir. Sentyabrın əvvəllərində “The Wall Street Journal” nəşri, ABŞ Prezidenti Donald Tramp administrasiyasının da USMCA-nı yenidən nəzərdən keçirməyə hazırlaşdığını yazmışdı. ABŞ Ticarət Nümayəndəliyi oktyabrın 4-dək saziş üzrə ictimai məsləhətləşmələrə start verəcək və proses bir neçə ay davam edəcək.
Ottava və Vaşinqton avqustun 1-dək ticarət sazişi üzrə razılığa gələ bilmədiyi üçün Vaşinqton USMCA-ya daxil olmayan bəzi Kanada məhsullarının idxalına gömrük rüsumlarını 25 faizdən 35 faizə qaldırıb. Donald Tramp, həmçinin bildirib ki, Kanada Fələstini tanımaq niyyətində olduğundan ticarət razılaşması əldə etmək çətin olacaq.
Qeyd edək ki, Kanada bir neçə aydır ABŞ-la ticarət sazişi bağlamağa çalışsa da, hələ ki buna nail ola bilməyib.
Bölmənin digər xəbərləri
