Keçən il Naxçıvanda 2683 ailəyə ünvanlı dövlət sosial yardımı təyin edilib
Naxçıvan, 12 fevral, AZƏRTAC
Ötən il Naxçıvanda yaşa görə 163 milyon 843 min 347 manat, əlilliyə görə 54 milyon 949 min 859 manat, ailə başçısını itirməyə görə isə 35 milyon 384 min 322 manat olmaqla, ümumilikdə, vətəndaşlara 254 milyon 177 min 528 manat əmək pensiyası ödənilib. 2461 nəfərə əmək pensiyası təyin olunub ki, bunlardan 1608-i proaktiv qaydada edilib.
AZƏRTAC-ın bölgə müxbiri xəbər verir ki, bu sözləri Naxçıvan Muxtar Respublikasının əmək və əhalinin sosial müdafiəsi nazirinin müavini, nazir vəzifələrini müvəqqəti icra edən Fərid Bağırzadə 2024-cü ilin yekunlarına dair mətbuat konfransında deyib.
Nazir müavini qeyd edib ki, məcburi dövlət sosial sığorta haqları hesabına vətəndaşlara əmək qabiliyyətinin müvəqqəti itirilməsinə görə 339 min 127 manat, uşağın anadan olmasına görə 1 milyon 228 min 942 manat, hamiləliyə və doğuma görə 1 milyon 650 min 271 manat, uşağa qulluğa görə 263 min 652 manat, dəfn üçün 1 milyon 156 min 680 manat ödəniş olub. Həmçinin 2360 nəfərə proaktiv qaydada məcburi dövlət sosial sığorta haqları hesabına müavinət təyin olunub. Ötən il 2683 ailəyə ünvanlı dövlət sosial yardımı təyin edilib və ilin sonuna 2408 ailəyə, ümumilikdə, 10 milyon 518 min 780 manat məbləğində ödəniş həyata keçirilib. Ailə başına düşən ünvanlı dövlət sosial yardımı məbləği 475 manat, adambaşına düşən məbləğ isə 107 manat olub. Muxtar respublikada aylıq sosial müavinətlər üzrə 41 milyon 523 min 62 manat, birdəfəlik sosial müavinətlər üzrə isə 1 milyon 93 min 391 manat ödəniş edilib.
“Naxçıvan Muxtar Respublikasında ünvanlı dövlət sosial yardımı ödənişlərinə 2022-ci il üzrə 861 min 21 manat, 2023-cü il üzrə 5 milyon 130 min 6 manat, 2024-cü ilin sonuna isə 10 milyon 518 min 780 manat vəsait sərf olunub. Ünvanlı dövlət sosial yardım alan aztəminatlı ailələrə ödənən ortaaylıq yardımın məbləği 2023-cü ildə 428 min 372 manat, 2024-cü ildə isə 876 min 565 manat təşkil edib. 2023-cü illə müqayisədə 2024-cü ildə bu rəqəm 104,62 faiz artıb”, - deyə Fərid Bağırzadə bildirib.
Bölmənin digər xəbərləri
