Kiçik kənd təsərrüfatı kreditlərinin verilməsində yenilik – “Pulapp”
Bakı, 23 dekabr, AZƏRTAC
Startapçı Məcid Məmmədov kiçik kənd təsərrüfatı kreditləri sahəsində fəaliyyət göstərən kredit təşkilatlarının işini asanlaşdıran və böhranlara davamlı yüksəkkeyfiyyətli kredit portfelinə nail olmaq üçün “Pulapp” xüsusi proqram təminatı hazırlayıb.
Bu barədə AZƏRTAC-a məlumat verən startapçı deyib: “15 ilə yaxındır bank sahəsində çalışıram. Təcrübəm əsasən kiçik və orta biznes kreditləşməsi və xidməti istiqamətlərində olub. Bu istiqamətdə çalışarkən “Pulapp” proqram təminatı ideyası yaranıb. “Pulapp”ın məqsədi kiçik kənd təsərrüfatı kreditlərinin verilməsində yenilik etməkdir. Yeni proqram təminatı müştəri ilə ilk tanışlıqdan sonra onun biznes məlumatlarını yerindəcə toplamağa və 30-40 dəqiqə ərzində kredit qərarını verməyə imkan verir. Bunun üçün sifarişlə bağlı sadə məlumatları mobil cihaz vasitəsilə bir dəfə daxil etmək yetərlidir. Edilmiş inteqrasiyalar sayəsində “Pulapp” müştərinin kredit tarixçəsi və rəsmi gəlirləri barədə məlumatları avtomatik rejimdə əldə edir və xüsusi alqoritmlərdən istifadə edərək kredit qərarının bütün şərtlərini əhatə etməklə müştəriyə anında kredit təklifi verir”.
M.Məmmədov qeyd edib ki, “Pulapp” bulud texnologiyası ilə işlədiyindən tərəfdaş kredit təşkilatlarının yalnız Kredit Bürosu ilə sadə inteqrasiya etməsini tələb edir. Bundan sonra “Pulapp” tətbiqi kredit təşkilatının satış nümayəndələrinin işlədəcəyi planşetlərə quraşdırılır. Proqram vasitəsilə təsdiq olunmuş kreditlərin qərarlarını və kredit sənədlərini yükləmək, kreditləşmə şərtlərini idarə etmək üçün tərəfdaşlara internet brauzer üzərindən müvafiq panellər təqdim edilir. Biznes kreditləşmədə borcverənlərin əsas qarşılaşdığı problem müştəri məlumatlarının etibarlılığı və verilən qərarların risk-satış balanslı olmasıdır.
“Pulapp” vasitəsilə emal olunmuş kredit sifarişlərinin əsas üstünlüyünə toxunan startapçı qeyd edib ki, biznes məlumatlarının heç bir hesablamalara məruz qalmadan ilkin formada daxil edilməsi fərdi interpretasiyaların məlumatların dürüstlüyünə təsirini minimuma salır. Proqram avtomatik rejimdə müştərinin kredit tarixçəsini və rəsmi gəlirləri barədə məlumatları əldə edir. Bu yolla toplanmış məlumatlar insan iştirakı olmadan təhlil olunur və yekun qərarda fərdi yanaşmalar faktoru istisna edilir. Kreditləşmə prosesinə sərf olunan zamanın kəskin azalması nəticə etibarı ilə imtina hallarında israf olunmuş resursları minimal edir və bu da potensial borcalanın keyfiyyətinə tələbkarlığı daha yüksək səviyyədə saxlamaq imkanı verir. “Pulapp” vasitəsilə emal olunan kredit sifarişlərinə sərf edilən resursların aşağı olması, tətbiqdən asan istifadə və daha effektiv idarə olunan risklər əməliyyat xərclərini və kredit risklərini kəskin azaldır. Bu da öz növbəsində Azərbaycanda böyük potensiala sahib olan və aşağı rəqabətlə səciyyələnən kiçik təsərrüfat kreditləri seqmentində səmərəli kreditləşmə həyata keçirmək üçün “Pulapp”ı əvəzolunmaz edir.
“Biz hazırda test rejimində “Merkuri” BOKT ilə əməkdaşlıq edirik. Bu, pilot layihə çərçivəsində Bərdə filialında əməkdaşların istifadəsinə verilib. Artıq üçüncü aydır ki, “Pulapp” fəaliyyət göstərir və nəticələr sevindiricidir. Layihənin az vaxtdır istifadəyə verilməsinə baxmayaraq, artıq 60 kredit təsdiqlənərək verilib. BOKT-un əməkdaşları kəndlərdə birbaşa satışlar aparır, müştərilərə kredit təklifləri edirlər. Gələcəkdə kənd təsərrüfatı olan istənilən rayonlarda proqram təminatı vasitəsilə kreditləşmənin sürətli və səmərəli həyata keçirilməsi mümkündür”, - deyə M.Məmmədov diqqətə çatdırıb.
Bölmənin digər xəbərləri
