KİYEVDƏ BƏDİİ GİMNASTİKA ÜZRƏ DÜNYA KUBOKU TURNİRİ KEÇİRİLİR
AZƏRTAC xəbər verir ki, Ukraynanın paytaxtı Kiyev şəhərində bədii gimnastika üzrə “Deryugina-Nefteqaz kuboku” uğrunda XVI beynəlxalq turnirinin açılışı olmuşdur. Bu turnir ikinci dəfədir ki, Dünya kuboku statusunda keçirilir.
Azərbaycanı yarışlarda Aliyə Qarayeva, Anna Qurbanova, Vəfa Hüseynova, Anna Bitiyeva, Valeriya Eqay, Alina Tryopina və Anastasiya Prasolova təmsil edirlər.
Martın 22-də gimnastların çoxnövçülük yarışlarına yekun vurulmuşdur. Qızlarımız 28,625 bal toplayaraq yeddinci yeri tutmuşlar. Birinci yeri İtaliya, ikinci yeri Rusiya, üçüncü yeri isə Ukrayna gimnastları qazanmışlar.
Çoxnövçülükdə 69,5 bal toplayan Aliyə Qarayeva qazaxıstanlı Aliyə Yusupoyla 7-8-ci yerləri bölüşmüşdür. Anna Qurbanova 65,6 balla 14-cü olmuşdur. Birinci yeri isə rusiyalı Olqa Kapranova tutmuşdur.
Martın 23-də turnir davam edəcəkdir.
Bölmənin digər xəbərləri
