KLASSİK MUSİQİ GECƏSİ
Azərbaycan Respublikası Gənclər Təşkilatları Milli Şurası, Bakı Musiqi Akademiyası, Azərbaycan “Kəndlərin İnkişafı” Uşaq və Gənclər İctimai Birliyinin təşkilatçılığı ilə keçirilən gecədə BMA-nın tələbə və məzunlarının ifasında Azərbaycan və klassik musiqi əsərləri səslənmişdir. Simli kvartet, tələbələr Nərgiz Oruclu, Zemfira Bağırova, Fərhad Aşumov, məzunlar - əməkdar artist Həsən Enami, müğənni Dinarə Əliyeva və başqaları Üzeyir Hacıbəyov, Rauf Hacıyev, Arif Məlikov və digər bəstəkarların əsərlərini ifa etmişlər. Dövlət gənclər siyasətinin həyata keçirilməsində fəal iştirakına və gənclərə göstərdikləri köməyə görə BMA-nın Tələbə-Gənclər Təşkilatına, akademiyanın rektoru, professor Fərhad Bədəlbəyliyə, Gənclər Təşkilatları Milli Şurasının sədri Fuad Muradova və bir qrup tələbəyə Gənclər və İdman Nazirliyinin, Gənclər Təşkilatları Milli Şurasının diplomları verilmişdir. BMA-nın “Ekspromt” Şən Hazırcavablar Klubuna isə ali məktəblər arasında yarışda birinci yer tutduğuna görə kubok təqdim olunmuşdur.
Bölmənin digər xəbərləri
