Köln şəhərində Xocalı soyqırımının 22-ci ildönümü ilə əlaqədar izdihamlı mitinq keçirilmişdir
Bakı, 24 fevral (AZƏRTAC). Almaniyanın Köln şəhərində Alman-Azərbaycan Mədəniyyət Evinin, “Soyqırımı Həqiqətlərini Tanıtma” İctimai Birliyinin və Alman Türkiyə Məzunları Birliyinin birgə təşkilatçılığı ilə Xocalı soyqırımının 22-ci ildönümünə həsr edilmiş yürüş-mitinq keçirilmişdir.
AZƏRTAC xəbər verir ki, “Köln evi” adlanan yerdə keçirilən yürüş- mitinqə Avropanın müxtəlif ölkələrindən gəlmiş insanlar, o cümlədən Kölndə fəaliyyət göstərən Azərbaycan Dayanışma Dərnəyindən Ufuk Kamal, Belçika-Azərbaycan Dostluq Cəmiyyətinin sədri Ayhan Dəmirçi, Alman-Azərbaycan Dostluq Cəmiyyətinin sədri Naibə Hacıyeva, Köln Ülkü Ocaqları, Atatürkçü Düşüncə Dərnəyi, müxtəlif diaspor fəalları, həmçinin almanlar dəstək vermişlər.
Yürüş-mitinqdə səsgücləndirici vasitəsilə Xocalı soyqırımı və Qarabağ həqiqətləri haqqında alman dilində məlumat verilmiş, çıxışlar dinlənilmişdir.
Almaniya vətəndaşları və müxtəlif ölkələrdən olan turistlər yürüş-mitinqi maraqla izləmişlər. Onlara Xocalı soyqırımı ilə bağlı broşürlər paylanılmışdır. Gənclərimiz ayrı-ayrılıqda turistlərə Xocalı soyqırımı və Qarabağ həqiqətləri haqqında məlumat vermişlər.
Alman polisinin məlumatına görə, mitinqdə 500-dən çox insan iştirak etmişdir.
Çıxışlarla davam edən tədbirdə Alman-Azərbaycan Mədəniyyət Evinin icraçı direktoru Rəşad Xasayoğlu Xocalı soyqırımı ilə bağlı məlumat vermişdir.
“Soyqırımı Həqiqətlərini Tanıtma” İctimai Birliyinin sədri Ceyhun Ələkbərov bildirmişdir ki, 1992-ci il fevralın 25-dən 26-na keçən gecə erməni silahlı dəstələri qəflətən Xocalıya hücum edərək şəhəri yerlə- yeksan etmiş, insanları kütləvi şəkildə qətlə yetirmişlər. Ceyhun Ələkbərov bu vəhşilikləri yaşayan və görən bir insan kimi həmin hadisələri tədbir iştirakçılarının təsəvvüründə canlandırmağın çox çətin olduğunu demişdir. Diqqətə çatdırmışdır ki, Xocalının işğalından sonra sağ qalan insanlar canlarını qurtarmaq üçün müxtəlif istiqamətlərə hərəkət etmişlər. Onlar Xocalıdan 10 kilometr uzaqlıqda vəhşicəsinə qətlə yetirilmiş və girov götürülmüşlər.
Xocalı soyqırımının canlı şahidi diqqətə çatdırmışdır ki, ermənilər cəsədlər üzərində insanlığa sığmayan vəhşiliklər etmişlər. Girov götürülmüş insanların daxili orqanları çıxarılaraq, orqan mafiyalarına satılmışdır. Bütün bunlar ermənilərin soyqırımını əvvəlcədən planlaşdırdıqlarını və bunu sistemli şəkildə həyata keçirdiklərini bir daha təsdiqləyir. Xocalıda törədilənlər 1948-ci il Cenevrə Konvensiyasının Genosid Aktının müddəalarına görə soyqırımı aktıdır. Hadisənin üzərindən 22 il keçməsinə baxmayaraq, bu qətliam hələ də dünya birliyi tərəfindən layiqincə qiymətləndirilməmiş və onun icraçıları cəzalandırılmamışlar.
Ceyhun Ələkbərov vurğulamışdır ki, biz xocalılıların yeganə istəyi dünyanın bu hadisəyə biganə qalmaması, bu qətliamı bir türkün və müsəlmanın deyil, insanlığın məhv edilməsi kimi dəyərləndirməsidir. Natiq onu da əlavə etmişdir ki, Azərbaycan dövlətinin bu istiqamətdə, ümumiyyətlə, ümummilli məsələlərlə bağlı sistemli şəkildə gördüyü işlər faydalı nəticəsini verməkdədir. Müvafiq məsələlərdə diaspor təşkilatlarımızın fəaliyyəti danılmazdır. Bütün bunlar Xocalıda törədilmiş vəhşiliklərin yaxın gələcəkdə dünya birliyi tərəfindən soyqırımı aktı kimi tanınmasına təkan verəcəkdir.
Sonra çıxış edən Dünya Azərbacanlıları Əlaqələndirmə Şurasının və Dünya Azərbaycanlıları Konqresinin idarə heyətinin üzvü Səftər Rəhimli bildirmişdir ki, Azərbaycan daim erməni terroru ilə üz-üzə qalmışdır. Onun sözlərinə görə, ermənilər həm Güney, həm də Quzey Azərbaycanda dəfələrlə azəri türklərinə qarşı soyqırımı törətmişlər. Onların sırasında ən dəhşətlisi isə Xocalı qətliamıdır. Almaniyada yaşayan türklər mövqelərindən, düşüncələrindən asılı olmayaraq, ümummilli məsələlərlə bağlı həmrəylik nümayiş etdirməlidirlər. Xocalı soyqırımı ilə bağlı mühüm işlər görülür. Bu tədbir də həmin işlərin tərkib hissəsidir və belə aksiyalar sistemli şəkildə davam etdirilməlidir.
Yürüş-mitinqin sonunda Kölndə yaşayan tarzən Vahid Vəliyevin ifasında “Bayatı-Şiraz” muğamı səslənmişdir.
Bölmənin digər xəbərləri
