Konstitusiya Məhkəməsi Aparatının 2023-cü il üzrə hesabat iclası keçirilib
Ötən il Konstitusiya Məhkəməsinin Plenumu tərəfindən baxılmış konstitusiya işləri ilə əlaqədar mühüm əhəmiyyətli 36 qərar və 14 qərardad qəbul edilib
Bakı, 1 fevral, AZƏRTAC
Fevralın 1-də Fərhad Abdullayevin sədrliyi ilə Azərbaycan Respublikası Konstitusiya Məhkəməsi Aparatının 2023-cü ilin yekunlarına həsr olunmuş hesabat iclası keçirilib.
Bu barədə AZƏRTAC-a Konstitusiya Məhkəməsinin mətbuat xidmətindən məlumat verilib.
İclasda çıxış edən sədr Fərhad Abdullayev bildirib ki, 30 ilə yaxın öz yurdlarından məcburi köçürülmüş vətəndaşlarımızın Konstitusiyada təsbit edilmiş bir sıra hüquqlarının, o cümlədən sərbəst hərəkət etmək, özünə yaşayış yeri seçmək, təhlükəsiz yaşamaq kimi hüquqlarının tam şəkildə təmin olunmasına zəmin yaranır.
Diqqətə çatdırılıb ki, Azərbaycan Prezidentinin 2022-ci il 29 sentyabr tarixli Sərəncamı ilə ötən il “Heydər Əliyev İli” elan edilib. Konstitusiya Məhkəməsi tərəfindən Ulu Öndər Heydər Əliyevin anadan olmasının 100 illiyi ilə bağlı silsilə tədbirlər keçirilib. Belə ki, hüquq olimpiadaları, ağacəkmə aksiyası, “XXI əsrdə insan hüquq və azadlıqlarının müdafiəsi sahəsində müasir nəzəri və praktiki yanaşmalar” mövzusunda elmi-nəzəri konfrans, Konstitusiya Məhkəməsində Ulu Öndərin zəngin irsini əks etdirən fotosərgi keçirilib.
Qeyd olunub ki, Ulu Öndər Heydər Əliyevin ideyaları, zəngin dövlətçilik irsi əsasında inkişaf yolunda inamla irəliləyən müasir Azərbaycan dövləti tarixinin qüdrətli dövrünü yaşayır.
Bildirilib ki, ötən il daxil olmuş sorğu, müraciət və şikayətlərlə bağlı Konstitusiya Məhkəməsinin Plenumu tərəfindən bir sıra mühüm qərarlar qəbul edilib.
Hesabat ili ərzində Konstitusiya Məhkəməsinin Plenumu tərəfindən baxılmış konstitusiya işləri ilə əlaqədar mühüm əhəmiyyətli 36 qərar və 14 qərardad qəbul edilib. Konstitusiya Məhkəməsinə 11 sorğu, 36 müraciət daxil olub.
Eyni zamanda, qeyd edilib ki, Konstitusiya Məhkəməsinə hesabat ili ərzində ümumilikdə 1912 ərizə və şikayət, onlardan 675 ərizə və şikayət onlayn müraciət vasitəsilə daxil olub.
Ulu Öndər Heydər Əliyevin bilavasitə təşəbbüsü ilə yaradılmış Konstitusiya Məhkəməsi 2023-cü ildə 25 illiyini qeyd edib. Bu yubiley münasibətilə Prezident İlham Əliyevin 2023-cü il 13 iyul tarixli Sərəncamı ilə Konstitusiya Məhkəməsinin hakimləri və Aparatın bir qrup əməkdaşı orden və medallarla təltif edilib. Sədr vurğulayıb ki, bu yüksək təltifləri biz Konstitusiya Məhkəməsinin kollektivinə göstərilən etimad olmaqla yanaşı böyük məsuliyyət kimi qəbul edirik.
Vurğulanıb ki, 2024-cü ilin vacib hadisələrindən biri fevralın 7-də növbədənkənar Prezident seçkilərinin keçirilməsidir. Konstitusiya Məhkəməsi qanunvericilikdə nəzərdə tutulmuş müddət çərçivəsində Prezident seçkilərini təsdiq və elan edir. Sədr Fərhad Abdullayev bir daha Konstitusiya Məhkəməsinin bütün kollektivinin səsvermədə fəal olmağa çağırdı.
İclasda Aparat rəhbərliyinin çıxışları, Aparatın müvafiq şöbə və sektor müdirlərinin hesabatları dinlənilib. Həmçinin Konstitusiya Məhkəməsinə daxil olan sorğu, müraciət və şikayətlərdə toxunulan hüquqi aspektlər, məhkəmə tərəfindən qəbul edilən qərarların icrası, tərtib olunan analitik arayış və rəylər, habelə təşkilati məsələlərlə bağlı məruzələr dinlənilib.
Daha sonra sədr diqqətə çatdırıb ki, Konstitusiya Məhkəməsinin yenilənmiş rəsmi internet səhifəsi və həmin internet səhifəsində yaradılmış axtarış sistemi müasir tələblərə cavab verərək, vətəndaşların ərizə və şikayətlərinin onlayn qəbulu, onlara operativ şəkildə baxılması, həmçinin ictimaiyyətin məhkəməyə əlçatanlığını daha da genişləndirmək üçün imkanlar yaradır.
Sədr vurğulayıb ki, Konstitusiya Məhkəməsi müəllifi Ulu Öndər Heydər Əliyev olan Əsas Qanunun aliliyinin təmin edilməsi, demokratik, hüquqi dövlət quruculuğu prosesinin möhkəmlənməsi və qanunçuluğun qorunması istiqamətində üzərinə düşən vəzifələri layiqincə yerinə yetirməyə çalışacaq.
Konstitusiya Məhkəməsinin sədri 2023-cü ildə görülmüş işləri qənaətbəxş qiymətləndirməklə yanaşı, qurumun fəaliyyətinin səmərəliliyinin artırılması məqsədilə hakimlərin icraatında olan işlərlə bağlı müvafiq tövsiyələr, Aparatın qarşısında duran vəzifələrlə bağlı bir sıra tapşırıqlar verib.
Bölmənin digər xəbərləri
