KOREYA RESPUBLİKASI PREZİDENTİNİN İŞ ADAMLARI İLƏ BİRGƏ NAHARI
Əvvəlcə Azərbaycanda İxracın və İnvestisiyaların Təşviqi Fondunun (AZPROMO) prezidenti Emil Məcidov çıxış edərək, iqtisadi sahədə ikitərəfli münasibətlərin inkişaf perspektivlərindən danışaraq demişdir ki, Koreya Ticarət və Sənaye Palatası ilə imzalanmış memorandum iki ölkənin işgüzar dairələri nümayəndələrinin birbaşa əlaqələr yaratmasına imkan verəcəkdir.
Koreya Ticarət və Sənaye Palatasının sədri Sohn Kyunq Şik öz ölkəsinin biznesmenlərinin Azərbaycan iqtisadiyyatına sərmayə qoymağa böyük maraq göstərdiklərini vurğulayaraq, qarşılıqlı surətdə faydalı əməkdaşlığın gələcəkdə dərinləşəcəyinə əmin olduğunu bildirmişdir.
Sonra Azərbaycanın Baş naziri Artur Rasizadə çıxış etmişdir. O demişdir ki, Koreya Respublikasının Prezidenti Ro Mu Hyunun Azərbaycana səfəri, keçirilmiş görüşlər və aparılmış danışıqlar ikitərəfli əməkdaşlığın daha da inkişaf etməsinə təkan verəcəkdir. Baş nazir dövlət müstəqilliyinə qovuşduqdan sonra ölkəmizin ümummilli lideri Heydər Əliyevin rəhbərliyi ilə bütün sahələrdə əldə etdiyi uğurlardan danışmış, ulu öndərin Azərbaycan dövlətçiliyinin möhkəmlənməsinə və respublikamızın beynəlxalq aləmdə nüfuzunun yüksəlməsinə yönəldilmiş siyasətinin hazırda Prezident İlham Əliyevin müvəffəqiyyətlə davam etdirdiyini vurğulamışdır. O demişdir ki, biz bir çox ölkələrlə və təbii ki, Koreya Respublikası ilə qarşılıqlı surətdə əməkdaşlığa böyük əhəmiyyət veririk. Ümidvaram, Koreya Respublikası rəhbərinin Azərbaycana rəsmi səfəri zamanı iki ölkənin iş adamları və rəsmi qurumlarının nümayəndələri arasında yaradılmış əlaqələr elə mühüm bünövrəyə çevriləcək ki, bunun əsasında qarşılıqlı surətdə faydalı münasibətlər daha intensiv inkişaf edəcəkdir. Yaxın gələcəkdə biz istər energetika sahəsində, istərsə də qeyri-neft sektorunda mühüm birgə layihələrin gerçəkləşəcəyinin şahidi olacağıq.
Koreya Respublikasının Prezidenti Ro Mu Hyun əvvəlcə Azərbaycana ilk səfəri zamanı gördükləri və milli iqtisadiyyatın yüksək inkişaf dinamikasından xəbər verən uğurlar barədə təəssüratını bölüşmüşdür. Dövlət başçısı öz ölkəsinin kəşməkəşli tarixinin əsas məqamları üzərində dayanaraq, İkinci Dünya müharibəsindən sonra dirçəlmə dövrünü yaşamış Koreya Respublikasının iqtisadi potensialından danışmışdır. O demişdir ki, indiki Koreya Respublikası yüksək inkişaf etmiş toxuculuq və avtomobil sənayesinə malikdir, elektronika, rabitə, yarımkeçiricilər istehsalı sahəsində ciddi göstəricilərə nail olmuşdur. Bundan başqa, ölkə şəhərsalma, təbii ehtiyatların işlənilməsi sahəsində dünyada liderdir. Hökumət yeni inzibati paytaxt yaratmağı planlaşdırır. Burada ən yüksək texnologiyalar, o cümlədən tikinti, ekologiya sahəsində texnologiyalar və informasiya texnologiyaları cəmləşdiriləcəkdir. Ölkədə daha 10 yeni şəhər də salmaq nəzərdə tutulur.
Koreya Respublikasının Prezidenti Azərbaycan dövlətinin başçısı İlham Əliyev ilə səmərəli danışıqlardan söhbət açaraq demişdir ki, ölkəniz tərəqqi etmək üçün hər cür imkanlara və zəngin təbii sərvətlərə malikdir. Koreyada olduğu kimi, Azərbaycanda da milli tarixə, qəhrəmanlara hörmət və ehtiramla yanaşırlar. Şəhidlər xiyabanını ziyarət zamanı bunu yəqin etdim.
Ali qonaq qarşılıqlı iqtisadi əməkdaşlığın perspektivlərindən danışaraq vurğulamışdır ki, onun ölkəsinin iqtisadiyyatı inkişaf etdirmək sahəsində zəngin təcrübəsi var və bu təcrübə Azərbaycana faydalı olardı. O, Azərbaycan biznesmenlərini koreyalı həmkarları ilə daha sıx əlaqələr yaratmağa çağırmış və demişdir ki, hər iki ölkədə səfirliklərin açılması da iqtisadi münasibətlərin inkişafına təkan verəcəkdir.
Bölmənin digər xəbərləri
