KOREYA RESPUBLİKASININ PREZİDENTİ RO MU HYUNUN NİTQİ
-Zati-aliləri hörmətli Prezident Əliyev!
Xanımlar və cənablar!
Mən Prezident Əliyevi və onun xanımını Azərbaycan Respublikası Prezidentinin Koreya Respublikasına ilk dövlət səfəri çərçivəsində salamlamaqdan məmnunam və Koreya xalqı adından Sizə səmimi qəlbdən “Xoş gəlmisiniz!” deyirəm.
Azərbaycana etdiyim səfəri, Azərbaycan xalqı ilə görüşümü səmimiyyətlə xatırlayıram və bilirəm ki, bütün vətəndaşlarınız çiçəklənən dövlət qurulması işində iştirak edir. Mənə böyük təəssürat bağışlamış gözəl Bakı şəhəri və paytaxtın müxtəlif yerlərində tikinti-abadlıq işlərinin aparılması xüsusi olaraq yadımdadır.
Azərbaycan olduqca gözəçarpan iqtisadi artıma nail olmuşdur. Bu göstərici 2005-ci ildə 26 faiz, ötən il isə 35 faiz təşkil etmişdir və beləliklə, ölkə son iki il ərzində ümumi daxili məhsulunu sürətlə artırmışdır. Azərbaycan nəinki öz milli infrastrukturunu genişləndirir, o cümlədən energetika, inşaat, elektron cihazlar istehsalı və turizm kimi sahələri əsasında öz sənayesinin şaxələndirilməsinə çalışır.
Tam əminəm ki, Azərbaycan Qafqaz regionunda əsas iştirakçı kimi öz fəaliyyətini davam etdirəcəkdir. Mən Sizin rəhbərliyinizi və Azərbaycan xalqının bacarığını yüksək dəyərləndirirəm.
Cənab Prezident, hesab edirəm ki, ölkələrimiz arasında ikitərəfli əməkdaşlıq üçün yeni üfüqlər açılır. Mənim səfərim və Sizin indiki səfəriniz bu əməkdaşlığı daha dərin və geniş edir.
Ötən il Birgə bəyannaməni imzaladıqdan sonra, bu gün biz yeni Birgə bəyannaməyə imza atdıq. Sərmayələrin təşviqi və qorunması haqqında saziş, habelə müxtəlif sahələrdə bir sıra anlaşma memorandumu da imzalanmışdır.
Cənubi Koreyanın bir çox şirkətləri Azərbaycanda hasilat sənayesindən tutmuş elektrik stansiyalarının tikintisinə qədər işləmək üçün yeni imkanlar araşdırırlar. İnformasiya texnologiyaları sahəsində işləyirlər.
Hesab edirəm ki, enerji sektorundan əlavə, dəmir yollarının çəkilməsi, limanların tikintisi və digər müxtəlif sahələrdə geniş əməkdaşlıq imkanları mövcuddur. Düşünürəm ki, inzibati idarəçilik sistemində əldə etdiyimiz təcrübə ölkənizdə və paytaxtda yeni idarəçiliyin qurulması üçün göstərdiyiniz səylər baxımından xüsusilə faydalı ola bilərdi.
Eyni zamanda, ölkələrimiz arasında səfər edənlərin get-gedə artan sayını görməkdən də məmnunam. Bu, Azərbaycan mədəniyyətini bizim ölkədə tanıdır. Ümidvaram ki, Azərbaycan ilə Cənubi Koreya iki dost kimi ümumi firavan gələcək naminə işləyəcəkdir.
Xanımlar və cənablar!
Sizi Azərbaycan Respublikasının Prezidentinin və Birinci xanımının şərəfinə, Azərbaycanın gələcəyi və ölkələrimiz arasında dostluğun şərəfinə qaldırdığım badəyə qoşulmağa dəvət edirəm.
Bölmənin digər xəbərləri
