KÜR ÇAYININ DAŞMASI NƏTİCƏSİNDƏ SABİRABAD RAYONUNA DƏYƏN ZİYAN ARADAN QALDIRILIR
Sabirabad, 18 avqust (AZƏRTAC). AZƏRTAC xəbər verir ki, bu ilin aprel-may aylarında leysan yağışlar və Kür çayının daşması nəticəsində Sabirabad rayonunda evləri uçmuş ailələr üçün fərdi evlərin tikintisi davam etdirilir. Su basan kəndlərin əraziləri dezinfeksiya edilir, kanallar lildən təmizlənir, drenaj şəbəkələr yenidən qurulur, bəndlər bərkidilir.
Kür daşqınlarının Sabirabad rayonuna vurduğu ziyan kompleks şəkildə aradan qaldırılır. Evləri uçmuş ailələr üçün şəhərdə və 15 kənddə 266 yeni evin tikintisi davam etdirilir. Xüsusi komissiya kəndlərdə çiy kərpicdən olan və yararsız vəziyyətə düşən digər evləri də siyahıya alır. Onların əvəzinə yenilərinin tikilməsi də nəzərdə tutulmuşdur. Daşqınlardan daha çox ziyan çəkən Bala Həşimxanlı, Əliləmbəyli, Zalqarağac və digər kəndlər də daxil olmaqla 7 min 785 hektar əkin sahəsi su altında qalmış, kanallar lillə dolmuşdur. İndiyədək 385 kilometr uzunluğunda kanal təmizlənmiş, 877 min 264 kubmetr torpaq işləri görülmüşdür. Kəndlərin həm içməli, həm də suvarma suyuna tələbatı tam ödənmişdir. Lildən təmizlənən kanallarda 100-ə yaxın hidrotexniki qurğu əsaslı təmir olunmuşdur.
Bala Həşimxanlı və Azadkənd kəndlərini, eləcə də əkin sahələrini su ilə təmin edən nasos stansiya da təmir edilərək işlək vəziyyətə gətirilmişdir. Nasos stansiyasının ətrafında yardımçı binaların tikintisi davam etdirilir.
Daşqınlar Kür və Araz çayları boyunca bəndlərin də bəzi hissələrini dağıdmış, çatlar yaratmışdır. Hazırda Ağcabədi rayon ərazisindən keçən Qarqar çayının ətrafından başlayaraq Kür çayı boyunca bəndlər təmir edilib bərkidilir və gələcəkdə daşqınların qarşısının alınması üçün də tədbirlər görülür. Sabirabad şəhərindən Həşimxanlı kəndinə qədər 33 kilometr uzunluğunda bənd də əsaslı təmir edilir. Bu əraziyə podrat təşkilatların yüzlərlə texnikası cəlb olunmuşdur.
Ağcabədi, İmişli, Neftçala, Salyan rayonlarında, eləcə də Saatlı və Sabirabad rayonlarının Qasımbəyli, Novruzlu, Türkədi, Qaracühürd kəndləri ərazilərində də bəndlərin bərkidilməsi davam etdirilir. Kür çayı boyunca ən təhlükəli ərazilərə xüsusi diqqət yetirilir.
Bölmənin digər xəbərləri
