LATVİYA PREZİDENTİ VAYRA VİKE-FREYBERQAYABAKI DÖVLƏT UNİVERSİTETİNİN FƏXRİ DOKTORU DİPLOMU TƏQDİM OLUNMUŞDUR
Oktyabrın 4-də Latviyanın Prezidenti Vayra Vike-Freyberqaya Bakı Dövlət Universitetinin BDU fəxri doktoru diplomunun təqdim edilməsinə həsr olunmuş mərasim keçirilmişdir.
Ali qonağı və onun həyat yoldaşını BDU-nun əsas binası önündə təhsil naziri Misir Mərdanov və universitetin rektoru Abel Məhərrəmov hörmətlə qarşıladılar. Tələbələr Prezidentə gül dəstəsi təqdim etdilər.
Latviya Prezidenti və onu müşayiət edən şəxslər əvvəlcə BDU-da yaradılmış “Heydər Əliyev” guşəsi ilə tanış oldular. Ümummilli lider Heydər Əliyevin təhsil aldığı illəri əks etdirən və digər şəkillər, universitetin tarixi barədə verilən məlumat qonaqlarda böyük maraq doğurdu.
Sonra mərasim başlandı. Universitetin professor-müəllim heyəti və tələbələr Latviya Prezidenti Vayra Vike-Freyberqanı hərarətli alqışlarla qarşıladılar.
BDU-nun rektoru, MEA-nın müxbir üzvü ABEL MƏHƏRRƏMOV mərasimi açaraq dedi:
- İcazə verin, ilk növbədə, hörmətli qonağımız, Latviya Respublikasının Prezidenti xanım Vayra Vike-Freyberqanı universitetimizə gəlməsi münasibətilə salamlayım və bu qocaman elm və təhsil ocağına “Xoş gəlmisiniz!” deyim.
Bu gün universitetimizin həyatında ən tarixi və ən əlamətdar günlərdən biridir. Latviya Prezidenti xanım Vayra Vike-Freyberqa universitetimizin qonağıdır və biz ona Bakı Dövlət Universitetinin fəxri doktoru diplomunun təqdim olunması mərasiminə toplaşmışıq. Ənənəmizə uyğun olaraq, əvvəlcə yeni fəxri doktorumuzun həyat və fəaliyyətinin bəzi məqamları barədə məlumat verim. O, Kanadanın Toronto Universitetinin psixologiya fakültəsini bitirmiş, Monreal Universitetində eksperimental psixologiya üzrə doktorluq dərəcəsi almışdır. 1965-ci ildən həmin universitetin professorudur. Kanada və Latviya Elmlər Akademiyalarının müxbir üzvüdür. Xanım Vayra Vike-Freyberqa bir neçə beynəlxalq təşkilatda mühüm vəzifələrdə çalışmış, Latviya Universitetinin rektoru olmuş, Avropa və Amerikanın bir sıra universitetlərinin fəxri adlarına layiq görülmüşdür. 8 monoqrafiya və 160 elmi məqalənin müəllifidir. 1999-cu və 2003-cü illərdə xanım Vayra Vike-Freyberqa Latviya Respublikasının Prezidenti seçilmişdir. Bu da təsadüfi deyildir. Çünki məhz xanım Vayra Vike-Freyberqanın prezidentliyi müddətində Latviya Respublikası dinamik inkişaf etmiş, dövlətçilik və müstəqillik möhkəmlənmişdir. Ötən il isə Latviya qarşıya qoyulmuş iki böyük məqsədinə nail olmuş - Avropa İttifaqına və NATO-ya üzv qəbul edilmişdir.
Hörmətli xanım Vayra Vike-Freyberqa, Azərbaycan ilə hərtərəfli dostluq və əməkdaşlıq əlaqələrinin inkişafı üçün göstərdiyiniz səyləri biz çox yüksək qiymətləndiririk. Azərbaycana bu səfəriniz, imzalanmış mühüm sənədlər ölkələrimizin münasibətlərində yeni perspektivlər açır.
Abel Məhərrəmov ölkənin ilk ali təhsil ocağı olan BDU haqqında qısa məlumat verərək dedi ki, 1919-cu ildə Azərbaycan Xalq Cümhuriyyəti tərəfindən yaradılmış universitetin xalqın maariflənməsində, Azərbaycan elminin inkişafında milli ideologiyanın formalaşmasında müstəsna xidmətləri olmuşdur. Hazırda universitetin 16 fakültəsində 17 minə yaxın tələbə, o cümlədən 15 ölkədən 600-ə qədər tələbə təhsil alır. Burada 1300-dən çox müəllim, o cümlədən 300-dək elmlər doktoru, professor çalışır. Bakı Dövlət Universiteti dünyanın ən qabaqcıl təhsil ocaqları ilə, o cümlədən ABŞ, Böyük Britaniya, Almaniya, Avstriya, Polşa, Fransa, Yaponiya və digər ölkələrin universitetləri ilə əməkdaşlıq edir, elmi əlaqələr saxlayır, birgə proqramlar üzərində işləyir.
BDU Avropa Universitetləri Assosiasiyasının üzvüdür. 40 ölkənin 143 universitetini əhatə edən Boloniya prosesində fəal iştirak edir. NATO-nun Elm Komitəsi ilə də işgüzar əlaqələri var və elm vasitəsilə təhlükəsizlik proqramının fəal iştirakçısıdır.
Rektor dedi ki, bütün başqa xalqlar kimi, biz də fəlakətli müharibələrsiz, çarəsi tapılmayan xəstəliklərsiz, səfalətsiz və daha ədalətli dünya nizamında yaşamağı düşünürük. Biz arzulayırıq ki, kiçik dövlətlərin gəncləri, o cümlədən Azərbaycan gəncliyi də fövqəldövlətlərdə olan həmkarları kimi gələcəyə ümidlə baxsınlar. Xanım Prezident, fikirimcə, Siz də razılaşarsınız ki, təcavüz nəticəsində 20 faiz torpaqları işğala məruz qalmış və 1 milyona qədər qaçqın-köçkünü olan Azərbaycan üçün ədalətli dünya nizamı xüsusi əhəmiyyət daşıyır. Bu ədalətli dünya nizamının düzümünü biz Avropa və Avratlantik məkanına inteqrasiya yolunda görürük. Bu yolun memarı Azərbaycan xalqının ümummilli lideri Heydər Əliyev olmuşdur və əminik ki, Prezidentimiz İlham Əliyevin rəhbərliyi ilə bu siyasi xətt uğurla davam etdiriləcəkdir.
Abel Məhərrəmov bildirdi ki, BDU-nun Elmi şurasının 2005-ci il 1 oktyabr tarixli iclasında Latviya ilə Azərbaycan arasında ənənəvi dostluq münasibətlərinin və əməkdaşlığın genişləndirilməsi və möhkəmləndirilməsində, sosial-siyasi elmlərin inkişafında xidmətlərinə görə xanım Vayra Vike-Freyberqaya Bakı Dövlət Universitetinin fəxri doktoru adı verilməsi qərara alınmışdır.
Hörmətli xanım Vayra Vike-Freyberqa, bir sıra dövlət başçıları, NATO və YUNESKO-nun rəhbərləri, dünya şöhrətli alimlər Bakı Dövlət Universitetinin fəxri doktoru adına layiq görülmüşlər. Biz əminik ki, görkəmli siyasi və dövlət xadimi kimi, elm və təhsil sahəsində inkaredilməz xidmətləri olan şəxs kimi Siz Bakı Dövlət Universitetinin fəxri doktorları sırasında öz layiqli yerinizi tutacaqsınız. İcazə verin, bu münasibətlə Sizi səmimi qəlbdən təbrik edim və Bakı Dövlət Universitetinin fəxri doktoru adının atributlarını sizə təqdim edim.
X X X
Latviya Prezidenti xanım Vayra Vike-Freyberqaya mantiya, fəxri doktorluq diplomu və vəsiqə təqdim olundu.
Prezident Vike-Freyberqa mərasimdə nitq söylədi.
Bölmənin digər xəbərləri
