QAN YADDAŞI
LƏNKƏRAN ŞƏHƏRİNDƏKİ “ŞƏHİDLƏR” ABİDƏ KOMPLEKSİNDƏ YENİDƏNQURMA İŞLƏRİ APARILIR
Lənkəran, 19 yanvar (AZƏRTAC). 20 Yanvar faciəsinin 20-ci ildönümü ərəfəsində Lənkəran şəhərindəki “Şəhidlər” abidə-kompleksində aparılan yenidənqurma işləri başa çatmaq üzrədir.
Ümumi sahəsi 2800 kvadratmetr olan xiyabanda şəhidlərin xatirəsinə əbədi məşəl inşa olunmuşdur. Burada yüksək keyfiyyətli qara qranitdən istifadə olunmaqla məzar daşları yenisi ilə əvəz edilmiş, əraziyə 1.430 kvadratmetr plitə daş döşənmiş, 50-yə yaxın müasir işıqlandırma dirəyi quraşdırılmış, abədənin ətrafı dəmir məhəccərlə hasara alınmışdır.
Xiyabanda 20 Yanvar və Qarabağ müharibəsi şəhidləri ilə yanaşı, 1918-ci ildə erməni vəhşiliklərinin qurbanı olan lənkəranlıların xatirəsi də əbədiləşdirilmişdir. Ümumilikdə, Azərbaycanın ərazi bütövlüyü və suverenliyi uğrunda şəhid olmuş 177 nəfər lənkəranlının adı mərmər daşlar üzərində həkk olunmuşdur.
Ümumxalq hüzn günündə “Şəhidlər” abidə-kompleksinin açılışı olacaqdır.
Qeyd edək ki, “Şəhidlər” xatirə kompleksi ilə yanaşı, rayonda şəhidlərin adını daşıyan küçə və meydanlar da yenidən qurulur, yollar genişləndirilir, ərazilərdə təmir və abadlıq işləri görülür.