LƏNKƏRANDA ELMİ–PRAKTİK KONFRANS KEÇİRİLMİŞDİR
Azərbaycan Milli Elmlər Akademiyası, Təhsil Nazirliyi və LDU-nun birgə təşkil etdikləri tədbirin iştirakçıları şəhərin mərkəzi meydanında ümummilli lider Heydər Əliyevin abidəsi önünə gül dəstələri qoymuş, böyük öndərin xatirəsini ehtiramla yad etmişlər.
Konfransda LDU-nun rektoru Asəf İsgəndərov çıxış edərək Milli Elmlər Akademiyasının 60 illik yubileyi ərəfəsində keçirilən tədbirin məqsəd və vəzifələrini açıqlamış, ali məktəb sistemində təhsillə elmin vəhdətindən danışmışdır.
Milli Elmlər Akademiyasının prezidenti, akademik Mahmud Kərimov konfransda “Azərbaycanın cənub bölgəsində elmi-texniki potensialın perspektivləri” mövzusunda məruzə etmiş, Lənkəranda fəaliyyətə başlayan Regional Elm Mərkəzinin bölgə üçün əhəmiyyətini yüksək qiymətləndirmişdir.
Toplantıda Milli Elmlər Akademiyasının həqiqi üzvü, akademik Asəf Nadirovun, Akademiyanın müxbir üzvləri Vasif Babazadənin, İdeal Nərimanovun, Lənkəran Şəhər Təhsil Şöbəsinin müdiri Səmədağa Abdullayevin və LDU-nun dosenti Tofiq Paşayevin mövzu ilə bağlı məruzələri dinlənilmişdir.
Milli Məclisin sosial siyasət daimi komissiyasının sədri Hadi Rəcəbli və Lənkəran Şəhər İcra Hakimiyyətinin başçısı Zeynal Nağdəliyev elm və təhsilin əhalinin sosial rifahının yaxşılaşmasına, əmək və təbii ehtiyatlardan səmərəli istifadə olunmasına müsbət təsirindən danışmışlar.
Bölmənin digər xəbərləri
