LƏNKƏRANDA İCMALAR ÜÇÜN KONFRANS KEÇİRİLMİŞDİR
Yerli hökumət qurumlarının, qeyri-hökumət təşkilatlarının və icma nümayəndələrinin iştirak etdiyi tədbirdə Azərbaycan İcma İnkişafı üzrə Araşdırmalar, Təlim və Resurs Mərkəzinin icraçı direktoru Yasin Dadaşov, “CHF İnternational”ın direktor müavini Timoti Mediqan və həmin təşkilatın ölkəmizdəki meneceri Ziba Quliyeva, Lənkəran Şəhər İcra Hakimiyyəti Aparatının şöbə müdiri Əlimərdan Əliyev konfransın məqsəd və vəzifələrindən, Proqram çərçivəsində rayonda iqtisadiyyatın inkişafı və sosial infrastrukturun yaxşılaşdırılması məqsədi ilə həyata keçiriləcək layihələrin əhəmiyyətindən danışmışlar.
Bildirilmişdir ki, “CHF İnternational” adı çəkilən Proqramı həyata keçirmək üçün ABŞ-ın Beynəlxalq İnkişaf Agentliyindən 11,5 milyon dollar qrant almışdır.
Proqram çərçivəsində ölkəmizin 11 rayonunda 150-dən artıq icmada müxtəlif layihələr həyata keçiriləcəkdir.
Tədbir iştirakçıları icmaların bu Proqramda iştirakı ilə bağlı müraciət formalarının doldurulma qaydaları ilə yaxından tanış olmuşlar.
Analoji tədbirlər Astara, Masallı və Cəlilabad rayonlarında da keçirilmişdir.
