Lerikdə koronavirus infeksiyası ilə bağlı maarifləndirmə və dezinfeksiya işləri gücləndirilib
Lerik, 3 aprel, Bağır Əliyev, AZƏRTAC
Koronavirus (COVID-19) pandemiyasının qarşısının alınması məqsədilə Lerik rayonunda maarifləndirmə və dezinfeksiya işləri gücləndirilib.
AZƏRTAC-ın bölgə müxbiri xəbər verir ki, koronavirus infeksiyasına mübarizə məqsədilə ölkəmizdə tətbiq olunan xüsusi karantin rejiminin tələblərinin yerinə yetirilməsi məqsədilə rayon ərazisində, o cümlədən Lerik şəhərində əhalinin sıx toplaşdığı yerlərdə maarifləndirmə və izahat işləri aparılır.
Bu məqsədilə rayon icra hakimiyyəti başçısının müavinləri, şöbə müdirləri, məsul işçiləri, mobil qrupların və rayon polis şöbəsinin əməkdaşları karantin rejiminin tələblərinə əməl etməyən vətəndaşlarla fərdi söhbətlər aparır, insanları xüsusi karantin rejiminin tələblərinin yerinə yetirilməsinə dəvət edirlər.
Fəaliyyət göstərən bütün ticarət obyektlərinin rəhbərləri ilə fərdi qaydada izahat işləri aparılır, karantinin tələblərinə sözsüz əməl edilməsi tələb olunur.
Lerik Rayon Daxili İşlər Şöbəsinin Yol Patrul Xidmətinin əməkdaşları tərəfindən nəqliyyat vasitələri ilə şəhərin bütün küçə və meydanlarında, məhəllələrində səsgücləndiricilər vasitəsi ilə vətəndaşları ehtiyac olmadıqda evdən çıxmamağa, xüsusi karantin rejiminin tələblərinin yerinə yetirilməsinə çağırışlar edilir.
Nazilər Kabineti yanında Operativ Qərargahın rayonlararası və şəhərlərarası nəqliyyat hərəkətinin tam dayandırılması və rayondaxili hərəkətin məhdudlaşdırılması ilə əlaqədar müvafiq qərarına əsasən polis əməkdaşları tərəfindən rayonun giriş-çıxış hissələrində postlar qurulub, təcili-tibbi yardım, qəza-bərpa, xilasedici, kənd təsərrüfatı, sosial xidmət məqsədli, həmçinin yük avtomobillərinin hərəkəti istisna olmaqla, nəqliyyatın hərəkəti məhdudlaşdırılıb.
Rayon icra hakimiyyətinin birinci müavini Cəlil Baxşıyev və aparatın digər əməkdaşlarının iştirakı ilə Lerik şəhərində xüsusi karantin rejiminin tələblərinin yerinə yetirilməsi vəziyyəti araşdırılaraq qaydaları pozan sakinlərə xəbərdarlıq edilib, maskasız, əlcəksiz gəzən sakinlərə rayon icra hakimiyyəti tərəfindən əlcək və maska paylanılıb.
Rayon ərazisində 65 yaşdan yuxarı tənha yaşayan 28 nəfərə rayon icra hakimiyyətində, ərazi icra nümayəndəliklərində və Yeni Azərbaycan Partiyası Lerik rayon təşkilatında yaradılmış könüllülər, DSMF-nin rayon şöbəsinin sosial xidmət işçiləri ilə birgə sosial-məişət xidmətləri göstərilib, onlara tibbi ləvazimatlar paylanılıb.
Gün ərzində Lerik şəhərində 4 inzibati idarə binasında, 3 çoxmənzilli yaşayış binasının həyətləri və pilləkən qəfəslərində, Hacı Heydər, Elmar Qarayev, Həzi Aslanov küçələrində koronavirus əleyhinə tibbi-profilaktik dezinfeksiyaedici tədbirlər davam etdirilib.
Bölmənin digər xəbərləri
