LEYSAN YAĞIŞLARI QAX VƏ ZAQATALADA DAŞQINLARA SƏBƏB OLMUŞDUR
Qax rayon Fövqəladə hallar komissiyasından AZƏRTAC-ın müxbirinə bildirmişlər ki, bir neçə gün davam edən güclü leysan yağışları Zəyəm kəndində xüsusilə təhlükəli vəziyyət yaratmışdır. Lahıc çayının məcrasından çıxması nəticəsində Zaqatala rayonunun Çobankol kəndinə düşən sel daha sonra Qax rayonunun ərazisinə daxil olaraq, Bakı-Balakən magistral avtomobil yolunun bir neçə kilometrlik hissəsini su altında qoymuş və Zəyəm kəndi üçün ciddi təhlükə yaratmışdır. Sel düşməsi nəticəsində avtomobil yolunun kənarında yerləşən həyətlər və əkin sahələri su altında qalmışdır. Hazırda Zəyəm kəndini sel təhlükəsindən xilas etmək üçün Meliorasiya və Su Təsərrüfatı Komitəsinin mütəxəssisləri və rayon Fövqəladə hallar komissiyası tərəfindən operativ tədbirlər görülür. Zəyəm kəndinə sel düşməsinin qarşısı alınmış və sel suları yeni qazılmış kanallar vasitəsilə bağlara və otlaq sahələrinə yönəldilmişdir.
Aramsız yağışlar Qapıçay və Kürmük çaylarında da daşqınlar yaratmış, bəzi yerlərdə sahilbərkidici bəndlər uçmuş, zədələnmiş, nəticədə Marsan, Çüdülü, Əlibəyli, İbaxlı və digər kəndlərdə həyətlərə, əkin sahələrinə və fındıq bağlarına su düşmüşdür.
