Liviyada Konstitusiya dəyişiklikləri seçkilərə şərait yaradacaqmı?
Bakı, 3 mart, AZƏRTAC
Liviyanın Ali Dövlət Şurası uzun illərdir baş tutmayan ümumxalq seçkilərinə münbit şərait yaratmaq məqsədi daşıyan konstitusiya dəyişikliyinə səs verib. Lakin ölkə daxilində münaqişə tərəfləri arasında seçkilərlə bağlı fikir ayrılıqları hələ də davam edir.
AZƏRTAC “Əl Ərəbiyə” telekanalına istinadla xəbər verir ki, bu həftənin əvvəlində Birləşmiş Millətlər Təşkilatının Liviya üzrə xüsusi nümayəndəsi illərlə davam edən münaqişənin həlli yolu kimi görünən seçkilərə imkan yaratmaq üçün siyasi prosesə rəhbərlik etmək istiqamətində fəaliyyətə başlayıb.
Liviyada 2021-ci ilin sonundan bəri planlaşdırılan seçkilər gərgin mübahisələr səbəbindən ləğv edilib və ölkənin şərqində yerləşən Nümayəndələr Palatası müvəqqəti hökumətə dəstəyini dayandırıb. Həmin vaxtdan bəri sülhyaratma səyləri Nümayəndələr Palatasının və Ali Dövlət Şurasının seçkilər üçün konstitusiya əsası və səsvermə qaydaları ilə bağlı razılığa gəlməsinə yönəldilib. Martın 2-də keçirilən səsvermədə Nümayəndələr Palatasının keçən ay təqdim etdiyi və seçkilərin keçirilməsi istiqamətində mühüm addım kimi qiymətləndirilən konstitusiya dəyişikliyi təsdiqlənib. Xarici güclər uzun müddətdir ki, böyük siyasi dəyişikliklərin həm Nümayəndələr Palatası, həm də Ali Dövlət Şurası tərəfindən 2015-ci ildə imzalanmış və son nəticədə münaqişəni həll edəcək qısa keçid dövrünün yaradılmasını nəzərdə tutan razılaşmaya əsasən təsdiqinin zəruriliyini qeyd edirlər. BMT-nin nümayəndəsi Abdulaye Bədili həmin sənədə istinad edərək, seçkilərlə bağlı yol xəritəsini qəbul etmək üçün Liviyanın əsas fiqurlarından ibarət rəhbər komitə təsis edildiyini bildirib. O əlavə edib ki, hazırda Liviyanın əksər qurumları legitimliyini itirib. Bədili vurğulayıb ki, hələ də namizədlərlə bağlı ciddi fikir ayrılığı mövcuddur və seçkilərini dəqiq tarixini müəyyən etmək mümkün olmayıb.
Liviyalıların əksəriyyəti siyasi liderlərin obyektiv mövqeyinə şübhə ilə yanaşır və bildirirlər ki, belə olan şəraitdə şəffaf seçkilər keçirmək mümkün deyil. Londondakı “Chatham House” analitik mərkəzindən Tim İtonun sözlərinə görə, konstitusiya dəyişiklikləri münaqişə tərəfləri arasında problemi həll etməyəcək. O əlavə edib ki, konsensus əldə etmək üçün Tripolidəki Ali Dövlət Şurası və şərqdəki Nümayəndələr Palatası ortaq məxrəcə gəlməlidir. “Hazırkı şəraitdə isə bu düzəlişlər labirint effekti yaradıb və bu, yalnız vaxtı uzatmaq məqsədi daşıyır”, -deyə politoloq vurğulayıb.
Bölmənin digər xəbərləri
