Logistikanın inkişafı naminə tərəfdaşlıq: Azərbaycan və “DP World”
Bakı, 20 yanvar, Tamilla Məmmədova, AZƏRTAC
Azərbaycanla “DP World” şirkətlər qrupu arasında tərəfdaşlıq nəinki mövcud infrastrukturun möhkəmləndirilməsinə xidmət edir, həm də uzunmüddətli perspektivdə ölkənin Şərqlə Qərb arasında tamhüquqlu nəqliyyat-logistika qovşağına çevrilməsi üçün real şərait yaradır.
AZƏRTAC xəbər verir ki, bu əməkdaşlıq tranzit yük axınının artmasına, əlavə investisiyaların cəlb olunmasına, ixracın inkişafının stimullaşdırılmasına və texnoloji tərəqqiyə töhfə verir ki, bu da son nəticədə Azərbaycanın iqtisadi dayanıqlığını, qlobal ticarət və logistika zəncirlərində əsas oyunçu kimi beynəlxalq statusunu möhkəmləndirir.
Yanvarın 19-da Azərbaycan Prezidenti İlham Əliyev Davosda dünyanın ən iri liman operatorlarından biri olan “DP World” şirkətlər qrupunun sədri və icraçı direktoru Sultan Əhməd bin Sulaim ilə görüşüb. Görüşdə “DP World” şirkətinin Azərbaycandakı fəaliyyətinin uğurlu olması məmnunluqla qeyd edilib, ölkəmizin mühüm beynəlxalq nəqliyyat dəhlizlərinin kəsişməsində yerləşdiyi vurğulanıb. Son dövrlərdə Azərbaycanda müasir nəqliyyat infrastrukturunun yaradılması istiqamətində həyata keçirilmiş layihələrdən bəhs olunub. Bu kontekstdə “DP World” şirkəti ilə əməkdaşlığın genişləndirilməsi üçün potensialın mövcud olduğu qeyd edilib.
Dünyanın müxtəlif ölkələrində 60-dan çox liman və terminalı, ümumilikdə təxminən 80 obyekti idarə edən “DP World”, həmçinin qlobal konteyner bazarının təxminən 9-10 faiz payını təmin edir. Şirkət investisiyalar və genişlənmiş infrastruktur hesabına ildə 100 milyon TEU-dan artıq yükü emal etmək imkanına malikdir. Son illərdə şirkət dayanıqlı maliyyə artımı və konteynerlərin emal həcminin əhəmiyyətli dərəcədə artmasını nümayiş etdirib. 2024-cü ildə onun limanları və terminalları təxminən 88,3 milyon TEU emal edib ki, bu da əvvəlki illə müqayisədə 8,3 faiz çoxdur. 2025-ci ilin birinci yarısında isə beynəlxalq konteyner dövriyyəsinin ümumi həcmi təxminən 45,4 milyon TEU təşkil edərək ötən ilin analoji dövrü ilə müqayisədə 6,7 faiz artım göstərib. Bu göstəricilər “DP World”u təkcə iri operator deyil, həm də qlobal logistika zəncirlərində mövqelərini möhkəmləndirməyə çalışan ölkələr üçün mühüm strateji tərəfdaş edir.
Şirkətin ölkə ərazisində mövcudluğunun gücləndirilməsi Bakı limanı vasitəsilə tranzit həcmlərini əhəmiyyətli dərəcədə artıra, blok-qatarların sayının çoxalmasına və “dəniz-dəmir yolu-avtomobil” multimodal marşrutlarının daha sıx inteqrasiyasına töhfə verə bilər.
Bundan əlavə, “DP World” ilə birgə əməkdaşlıq Azərbaycanda limanların və logistika dəhlizlərinin genişmiqyaslı rəqəmsal modernləşdirilməsi perspektivlərini açır. “DP World” yüklərin emalının optimallaşdırılmasına, təchizat zəncirlərinin şəffaflığının artırılmasına və tranzitin sürətləndirilməsinə yönəlmiş rəqəmsal texnologiyalara və inteqrasiya olunmuş logistika həllərinə fəal şəkildə investisiya yatırır ki, bu da Avrasiya marşrutları arasında yük axınları uğrunda rəqabətin artdığı şəraitdə xüsusilə vacibdir. Bu, “smart port” (“ağıllı liman”) həllərindən istifadəni, terminal əməliyyatlarının avtomatlaşdırılmasını və məlumatların idarə edilməsi üçün qabaqcıl platformaların tətbiqini əhatə edir ki, bu da nəqliyyat sisteminin ümumi səmərəliliyini əhəmiyyətli dərəcədə artırmağa imkan verir.
“DP World” üçün isə Azərbaycanla əməkdaşlıq bir sıra konkret iqtisadi və strateji üstünlüklər yaradır. Şirkət inkişaf etməkdə olan Orta Dəhlizə birbaşa çıxış əldə edir ki, bu da yüklərin emalı həcmlərinin və bununla bağlı gəlirlərin əhəmiyyətli dərəcədə artırılması potensialını açır.
Bölmənin digər xəbərləri
