Lutsk şəhərində girovluqdan azad olunanların səhhəti qənaətbəxşdir
Bakı, 22 iyul, AZƏRTAC
Ukraynanın Lutsk şəhərində iyulun 21-də girov götürülmüş avtobusdan azad olunan insanların səhhəti qənaətbəxşdir, onlardan heç biri xəstəxanaya müraciət etməyib.
AZƏRTAC Ukrinform informasiya agentliyinə istinadla xəbər verir ki, bu barədə Ukrayna Təhlükəsizlik Xidmətinin Volınsk vilayəti idarəsinin rəisi Pavel Danyukov bildirib.
“Girovlar on saatdan çox bağlı avtobusda qalıb, sonra isə bir neçə saat dindirilib... Onlar reys avtobusu ilə hərəkət edən adi insanlardır. Xəstəxanaya heç kim müraciət etməyib, hamısının səhhəti qənaətbəxşdir”, - deyə Pavel Danyukov bildirib. Onun sözlərinə görə, hazırda girovlarla psixoloq məşğul olur.
Qeyd edək ki, iki dəfə mühakimə olunmuş Rusiya vətəndaşı Maksim Krivoş dünən səhər partlayıcı və odlu silahla Lutsk şəhərinin mərkəzində reys avtobusunu və içərisindəki 13 sərnişini girov götürüb. Hüquq-mühafizə orqanlarının məlumatına görə, o, ümumi tələblər irəli sürüb və sistemdən narazılığını bildirib. Cinayətkar, həmçinin Ukrayna Prezidenti Vladimir Zelenskidən “Yer sakinləri” filminə baxmağı tələb edib. Dövlət başçısı özü terrorçu ilə telefonla danışıb və onu girovları azad etməyə razı salıb. Zelenski deyib ki, telefon danışığından sonra terrorçu girov götürdüyü insanları avtobusdan buraxmağa başlayıb.
Axşam saatlarında girovların hamısı azad edilib, cinayətkar isə həbs olunub. Ukrayna Təhlükəsizlik Şurası hadisəni terror aktı kimi qiymətləndirib.
Bölmənin digər xəbərləri
