Mahir Məmmədov: Şahmatçılarımız şəxsi Avropa çempionatından yüksək nəticəyə nail olmaqla bizi sevindirdilər
Bakı, 7 aprel, AZƏRTAC
Azərbaycan şahmatçıları Sloveniyadakı şəxsi Avropa çempionatında uğurla çıxış etdilər. Təmsilçilərimiz qitə birinciliyində yüksək nəticəyə nail olmaqla bizi sevindirdilər.
AZƏRTAC xəbər verir ki, bu sözləri Azərbaycan Şahmat Federasiyasının (AŞF) prezidenti, Beynəlxalq Şahmat Federasiyasının (FİDE) vitse-prezidenti Mahir Məmmədov deyib.
M.Məmmədov qeyd edib ki, Vasif Durarbəyli 8 xal toplamaqla yekunda 3-8-ci yerləri bölüşdürdü. Abdulla Qədimbəyli, Misrətdin İsgəndərov, Qədir Hüseynov müvafiq olaraq 9-11-ci yerlərdə qərarlaşdı. İlk dəfə olaraq qitə birinciliyinin nəticələrinə əsasən 4 təmsilçilərimiz Vasif Durarbəyli, Abdulla Qədimbəyli, Misrətdin İsgəndərov və Qədir Hüseynov 2023-cü ildə keçiriləcək dünya kuboku yarışına vəsiqə qazanıb.
“Üç şahmatçımız fərdi normativləri yerinə yetirib. Son turda parlaq qələbə qazanan Read Səmədov ilk, Abdulla Qədimbəyli isə qrossmeyster üzrə ikinci normativini toplayıb. Abdulla karyerasında ən yaxşı turnirlərdən birini keçirdi və çempionatda uzun müddət liderlər qrupunda mübarizə apardı. Bununla yanaşı, Gövhər Beydullayeva xanımlar arasında ən yaxşı nəticəni göstərib və qadınların qrossmeyster üzrə son normasını yerinə yetirib”, - deyə M.Məmmədov əlavə edib.
Bölmənin digər xəbərləri
