Maqdeburqda Milad bazarına hücum nəticəsində xəsarət alanlardan biri xəstəxanada dünyasını dəyişib
Berlin, 6 yanvar, AZƏRTAC
Almaniyanın Saksoniya-Anhalt əyalətinin paytaxtı Maqdeburq şəhərindəki Milad yarmarkasında dekabrın 20-də törədilən qanlı hadisə nəticəsində həlak olanların sayı 6-ya çatıb.
AZƏRTAC xəbər verir ki, hadisə nəticəsində xəsarət alan və müalicəsi xəstəxanada davam etdirilən 52 yaşlı qadın dünyasını dəyişib.
Xatırladaq ki, əslən Səudiyyə Ərəbistanından olan 50 yaşlı Taleb Al Abdulmohsen adlı şəxs yüksək sürətlə idarə etdiyi “BMW X3” markalı avtomobili şəhərdəki Milad yarmarkasında izdihamın üzərinə sürməsi nəticəsində həmin gün 5 nəfər, o cümlədən dörd qadın və bir uşaq həlak olmuş, 300-dən çox insan xəsarət almışdı.
Hadisə yerində yaxalanan həmin şəxsin 2006-cı ildən Almaniyada yaşadığı və Bernburq şəhərində həkim (psixiatr) işlədiyi müəyyən edilib. Onun sosial mediada İslam dini əleyhinə çıxış və çağırışlar etdiyi məlum olub.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
