Marselo Abi-Ramia Kaetanon: Sosial təminat sistemlərini yeni texnologiyalara uyğunlaşdırmalıyıq
Bakı, 29 may, Göyçək Mahmudlu, AZƏRTAC
Bütün dünyada sosial təminat sisteminin təkmilləşdirilməsi üçün çalışırıq. Qlobal perspektivləri gətirməklə ümumi baxış əldə etmiş oluruq.
AZƏRTAC xəbər verir ki, bunu Beynəlxalq Sosial Təminat Assosiasiyasının baş katibi Marselo Abi-Ramia Kaetanon "Müasir dünyanın çağırışları kontekstində sosial müdafiə sistemlərinin uyğunlaşdırılması" mövzusunda beynəlxalq konfransın açılış mərasimində deyib.
Sosial təminat sisteminin qarşılaşdığı çətinliklərdən danışan baş katib qeyd edib: "Sosial təminat sisteminin keyfiyyətini artırmaq üçün yeni texnologiyaların necə inteqrasiya edilməsi yollarını müzakirə edirik. Bu zaman süni intellekt, bir çox rəqəmsallaşdırma, kibertəhlükəsizlik məsələləri üzə çıxır. Bundan başqa, sosial təminat sisteminin maliyyələşdirilməsi və əhalinin yaşlanması kimi məsələlər də var. Aktiv yaşlılıq ən çox müzakirə edilən məsələlərdən biridir. Biz yaşlanan cəmiyyətə hansı xidmətləri təklif edirik? Təqdim etdiyimiz xidmətlər təkcə ödəmələrdən ibarət deyil. Sosial təminat təşkilatları qarşısındakı çətinliklərdən biri də əhatə dairəsidir. Burada təkcə pensiyalardan söhbət getmir. Daha geniş perspektivdən buna baxırıq və dünyanın müxtəlif regionlarında onu müşahidə edirik. Müxtəlif cəmiyyət qruplarını nəzərə alırıq. Ənənəvi qrupları əhatə etmək çətindir. Bu, evdə çalışan işçilər, kimdənsə asılı olanlar kimi qruplara aiddir. İllər boyu yeni iş formalarını görürük. Sosial xidmətlər onları necə ehtiva edə bilər deyə düşünürük. Qısası, çətinliklər ortaya çıxır: kibertəhlükəsizlik, texnologiya istifadəsi, maliyyələşdirmə, əhatə dairəsinin genişləndirilməsi. Bunlar dominant məsələlərdir. Lakin başqa məsələlər də var. Bütün dünyada trendlərin gücləndirilməsini görürük, bəzi hallarda oxşar həllər tapılır. Lakin unikal həllər yoxdur. Çətinliklər eyni olsa da, həllər eyni deyil. Biz həlləri lokal reallıqlara adaptasiya etməliyik. Bunların müxtəlif mədəni perspektivdə olduğunu, bir çox faktorları nəzərə almalıyıq".
Bölmənin digər xəbərləri
