Maykl Kerrik: “Sabah” çox hazırlıqlı və özünəməxsus oyun üslubu olan komandadır
London, 9 sentyabr, AZƏRTAC
Yenidən Çempionlar Liqasında olmaq xoşdur. Burada iştirakımızın müddətini mümkün qədər uzatmağa çalışacağıq.
AZƏRTAC xəbər verir ki, bu sözləri “Mançester Yunayted”in baş məşqçisi Maykl Kerrik UEFA Çempionlar Liqasının liqa mərhələsində İngiltərədə “Sabah”a qarşı keçirəcəkləri ilk tur oyunundan öncə mətbuat konfransında deyib.
45 yaşlı mütəxəssis bildirib ki, qarşıda böyük çağırışlar var: “Biz Çempionlar Liqasındakı oyunları səbirsizliklə gözləyirik”.
“Sabah” haqqında da fikirlərini bölüşən ingiltərəli çalışdırıcı Azərbaycan təmsilçisinin hazırlıqlı və özünəməxsus oyun üslubu ilə seçilən komanda olduğunu söyləyib: “Bunu aydın şəkildə görmək mümkündür. Bir çox matçda qalib gəliblər və inamlı çıxış edirlər. Komanda olaraq yaxşı təzyiq göstərir, meydanda öz oyunlarını sərgiləməyə çalışırlar. Xeyli üstün cəhətləri var. Topla meydanın müxtəlif zonalarında irəliləyə və yaxşı hücumlar qura bilirlər. Buna görə də sabah hansı rəqiblə qarşılaşacağımızın və bizi gözləyən çətinliklərin tam fərqindəyik”.
Qeyd edək ki, sentyabrın 10-da “Old Trafford” stadionunda keçiriləcək “Mançester Yunayted” – “Sabah” oyunu Bakı vaxtı ilə saat 23:00-da başlayacaq.
Bölmənin digər xəbərləri
