Elmira Axundova: Aleksandr Şarovski bütöv bir epoxa idi
Bakı, 9 sentyabr, AZƏRTAC
Aleksandr Şarovskini uzun illərdir tanıyırdım. Mənim 17 yaşlı nəvəm teatrı məhz Aleksandr Şarovskinin tamaşaları sayəsində sevib. Hətta eyni tamaşaya iki-üç dəfə baxmağa gedirdi. Bu yaxınlarda mənə dedi ki, Şarovskinin yeni tamaşasına da gedək. Təəssüf ki, artıq həmin tamaşanı görə bilməyəcəyik. Bu itki isə mənim üçün çox ağırdır.
AZƏRTAC xəbər verir ki, bu sözləri jurnalistlərə açıqlamasında Xalq yazıçısı Elmira Axundova söyləyib.
Onun sözlərinə görə, Aleksandr Şarovski bütöv bir epoxa idi. Onun yaradıcılıq fəaliyyəti teatrın tarixində ən parlaq mərhələlərdən biri kimi yadda qalıb. Həmin dövrdə bir-birindən maraqlı tamaşalar səhnəyə qoyulub.
“Onun tamaşaları həyatın özünə bənzəyirdi. Həyatımız da qara və ağ rənglərin bir-birini əvəz etdiyi tamaşadır: səhər yas mərasiminə, axşam isə toya və ya ad gününə gedirik. Bir pərdədə insanlar gülür, digərində isə faciə baş verir. Həyat da məhz belədir”, – deyə Xalq yazıçısı vurğulayıb.
Elmira Axundova bildirib ki, Aleksandr Şarovski teatra gələn insanların buradan xoş əhvali-ruhiyyə ilə ayrılmasını istəyirdi. Bununla belə, onun son tamaşası olduqca ağır və düşündürücü idi: “Bəlkə də hansısa məqamları əvvəlcədən hiss edirdi. Onun ayaqlarında ağrılar olduğunu bilirdim. Lakin bir dəfə də olsun şikayət etdiyini eşitmədim”, – deyə o əlavə edib.
Bölmənin digər xəbərləri
