Yeni aqrar siyasət iqlim və geosiyasi çağırışlara çevik reaksiyanı nəzərdə tutur - ŞƏRH
Bakı, 9 sentyabr, AZƏRTAC
Prezident İlham Əliyevin sədrliyi ilə keçirilən kənd təsərrüfatı məsələlərinə həsr olunmuş müşavirədə müəyyənləşdirilən yeni hədəflər Azərbaycanın aqrar sektorunda keyfiyyətcə yeni inkişaf mərhələsinin əsasını qoyur.
Bunu AZƏRTAC-a açıqlamasında Aqrar Xidmətlər Agentliyinin Dövlət toxum nəzarəti və qeydiyyatı şöbəsinin müdiri Fikrət Feyziyev deyib.
Fikrət Feyziyev bildirib ki, dövlətimizin başçısı müşavirədə ölkənin kənd təsərrüfatının inkişafı istiqamətində görülmüş işləri, qəbul edilmiş dövlət proqramlarını və onların nəticələrini yüksək qiymətləndirib. Bununla yanaşı, dünyada gedən təbii və antropogen proseslər aqrar sahədə çevik həllərin tətbiqini zəruri edir.
“Prezidentin qeyd etdiyi kimi, dünyada gedən təbii və antropogen proseslər aqrar sahədə çevik həllərin tətbiqini zəruri edib. Bu istiqamətdə qarşıya qoyulan hədəflər, nəticə etibarilə, geosiyasi şəraitin, eyni zamanda, qlobal iqlim dəyişikliklərinin meydana çıxardığı problemlərin həllinə yönəlib. Burada diqqətçəkən əsas məqamlardan biri kənd təsərrüfatının inkişafına inteqrasiyalı yanaşmanın meydana çıxmasıdır. Suvarma, torpaq idarəçiliyi, texnologiya, maliyyə dəstəyi, ixrac, emal sənayesi və sosial rifah kimi müxtəlif istiqamətlərin bir-biri ilə əlaqələndirilərək vahid sistem kimi müzakirə olunması aqrar siyasətdə yeni yanaşmanı nümayiş etdirir.
Bu o deməkdir ki, ölkənin aqrar siyasəti texnoloji, ekoloji və sosial-iqtisadi dayanıqlığın təmin olunmasını əsas hədəf kimi seçib. Ümumiyyətlə isə kənd təsərrüfatının inkişafı üzrə Dövlət Proqramı qarşıya torpaq və su resurslarını qorumaqla kəmiyyətcə çox, keyfiyyətcə sağlam məhsul əldə edərək ərzaq, qida və sosial-iqtisadi təhlükəsizliyin təmin olunmasını hədəfləyir”, – deyə şöbə müdiri qeyd edib.
F.Feyziyev yeni Dövlət Proqramında məhsuldarlığın artırılması, ixrac potensialının genişləndirilməsi və ərzaq təhlükəsizliyinin gücləndirilməsinin ölkə iqtisadiyyatına və qeyri-neft sektorunun inkişafına mühüm təsir göstərəcəyini bildirib.
AXA rəsmisi qeyd edib ki, son illərdə aqrar sahənin inkişafının təmin olunması üçün bir sıra dövlət proqramları ardıcıl şəkildə həyata keçirilib. Onun sözlərinə görə, baramaçılıq və ipəkçiliyin, tütünçülüyün, şərabçılığın, çəltikçiliyin, çayçılığın, sitrus meyvəçiliyinin və pambıqçılığın inkişafına dair dövlət proqramlarının icrası nəticəsində bitkiçiliyin bir çox istiqamətləri üzrə nəzərəçarpan nəticələr əldə edilib və bir sıra məhsullar üzrə ölkənin ixrac potensialı artıb.
Şöbə müdiri bildirib ki, “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı” aqrar sahədə dayanıqlı inkişafın təmin edilməsinə və intensiv, rəqabətqabiliyyətli istehsal modelinə keçidə xidmət etməlidir.
“Bir sözlə, iqlimə davamlı aqrar istehsal modelinin tətbiqi özü ilə torpaq və su ehtiyatlarından səmərəli istifadə olunmasına, toxum təminatının yaxşılaşdırılmasına, nəticədə əkin sahələrindən çox və keyfiyyətli məhsul istehsalına gətirib çıxaracaq. Çox və keyfiyyətli məhsul isə fermerlərin əlavə maliyyə imkanlarının artması, eyni zamanda, ölkənin ixrac potensialının yüksəlməsi deməkdir”, - deyə F.Feyziyev əlavə edib.
Müxbir – Pərvanə Qafarova
Bölmənin digər xəbərləri
