MDB ÖLKƏLƏRİ ÜÇÜN İNSAN RESURSLARININ İNKİŞAFI ÜZRƏ I REGİONAL İCLAS İŞƏ BAŞLAMIŞDIR
İclasda Belarus, Qazaxıstan, Qırğızıstan, Moldova, Rusiya, Özbəkistan, Tacikistan və digər ölkələrin nümayəndələri iştirak edirlər.
Açılış mərasimində RİTN-in Strateji planlaşdırma və elmi potensial şöbəsinin bölmə müdiri Rüfət Gülməmmədov və Beynəlxalq Elektrik Rabitəsi İttifaqının nümayəndəsi Jan Klod Foq tədbir iştirakçılarını salamlamış, iclasın işinə uğurlar arzulamışlar.
Rüfət Gülməmmədov “Müasir informasiya texnologiyalarının insan resurslarının inkişafında rolu” mövzusunda məruzəsində Azərbaycanda informasiya və kommunikasiya texnologiyalarının (İKT) inkişaf etdirilməsi ilə bağlı həyata keçirilən tədbirlər barədə məlumat vermiş, respublikada daxili sərmayələrin həcminin ildən-ilə artması nəticəsində müxtəlif sahələrdə fəaliyyət göstərən yeni birgə müəssisələr yaradıldığını bildirmişdir. O qeyd etmişdir ki, ölkədə rabitə sahəsinin ümumi daxili məhsuldakı (ÜDM) payı 2-2,3 faizdir, inkişaf etmiş ölkələrdə isə bu göstərici təxminən 4-5 faiz təşkil edir. Son 10 ildə telefon şəbəkəsinin ümumi tutumu təxminən 50 faiz artmış, göstərilən xidmətlərin keyfiyyəti yüksəlmişdir. Məruzəçi hazırda Azərbaycan hökuməti və BMT-nin İnkişaf Proqramının “Elektron-hökumət” layihəsi çərçivəsində respublikanın bütün bölgələrini əhatə edəcək “AzDATAKOM” şəbəkəsinin təşkilinə hazırlıq işləri apardıqlarını diqqətə çatdırmışdır.
Oktyabrın 5-dək davam edəcək iclasda “İR-in yenidən təşkili: İR-in idarə olunmasının yeni rolu”, İR-in idarə olunması sahəsində MDB ölkələrinin bəzi metod və novator təcrübələri”, “İR-in elektron vasitələrlə idarə olunması”, “MDB ölkələrinin nümunələri və əldə olunmuş təcrübələr” və s. mövzularda məruzələr dinləniləcəkdir.
