MDB XÜSUSİ XİDMƏT ORQANLARI RƏHBƏRLƏRİNİN İCLASI BAŞA ÇATMIŞDIR

27.09.2004 [17:00]
Çap et
A⁺ A^-

AZƏRTAC-ın xüsusi müxbiri xəbər verir ki, Almatıda MDB-nin üzvü olan dövlətlərin Təhlükəsizlik və Kəşfiyyat Xidmətləri Rəhbərləri Müşavirəsinin 5-ci iclası başa çatmışdır.

Azərbaycanın milli təhlükəsizlik naziri Eldar Mahmudovun başçılığı ilə nümayəndə heyətinin də təmsil olunduğu yığıncaqda iqtisadi təhlükəsizlik sahəsində əməkdaşlıq, müasir şəraitdə beynəlxalq terrorizmlə mübarizə, qeyri-qanuni yolla əldə edilmiş kapitalın silinməsi, valyuta-maliyyə və investisiya sahələrində fırıldaqçılıq, xammal və strateji məhsulların qaçaqmalçılığına qarşı birgə mübarizə, qeyri-qanuni miqrasiya probleminin həllində xüsusi xidmət orqanlarının gücündən səmərəli istifadə edilməsi məsələləri müzakirə olunmuşdur.

Qərara alınmışdır ki, narkotiklərin daşınmasının və beynəlxalq terrorçu təşkilatların vaxtında aşkar edilməsi sahəsində tədbirlər planı hazırlanmalıdır.

İclasda müşavirənin nizamnaməsində, habelə əməkdaşlığın əsas prinsipləri ilə bağlı sazişə dəyişiklik edilmişdir.

Qazaxıstan Milli Təhlükəsizlik Komitəsinin rəhbəri Nartay Dutbayev Müşavirənin sədri seçilmişdir.

Yekunda memorandum imzalanmışdır.