MDU rektoru: Naxçıvandakı beynəlxalq konfrans Türk dünyasının ortaq mədəni yaddaşını birləşdirir
Naxçıvan, 27 may, AZƏRTAC
Naxçıvanda keçirilən “Memar Əcəmi Naxçıvaninin 900 illik yubileyinə həsr olunmuş I Beynəlxalq Mədəni İrs və Dayanıqlı Turizm Konfransı” qədim tarixə, zəngin dövlətçilik ənənələrinə və böyük mədəni-intellektual irsə malik bu diyarın elmi, mənəvi və strateji əhəmiyyətini bir daha nümayiş etdirir. Konfrans müxtəlif ölkələrdən alim və tədqiqatçıları bir araya gətirməklə yanaşı, Türk dünyasının ortaq tarixi yaddaşını, mədəni kimliyini və sivilizasiya dəyərlərini vahid elmi platformada birləşdirən mühüm fikir məkanı kimi çıxış edir.
AZƏRTAC xəbər verir ki, bu fikirləri Mingəçevir Dövlət Universitetinin rektoru Anar Eminov səsləndirib.
Rektor bildirib ki, Naxçıvan tarix boyu Türk-islam mədəniyyətinin aparıcı elm, sənət və memarlıq mərkəzlərindən biri olub, bəşər sivilizasiyasına mühüm töhfələr verib. Onun sözlərinə görə, bu torpağın yetirdiyi böyük sənətkar Memar Əcəmi Naxçıvani yalnız Azərbaycan memarlıq məktəbinin deyil, ümumilikdə dünya memarlıq düşüncəsinin ən görkəmli nümayəndələrindən biridir.
Anar Eminov vurğulayıb ki, Memar Əcəminin yaratdığı memarlıq nümunələri estetik kamilliklə yanaşı, yüksək elmi-intellektual təfəkkürün, mühəndislik dəqiqliyinin və dərin fəlsəfi düşüncənin təcəssümüdür. Bu baxımdan, dahi memarın 900 illik yubileyinə həsr olunan beynəlxalq konfransın təşkili mədəni irsə elmi yanaşmanın gücləndirilməsi, tarixi yaddaşın qorunması və ortaq sivilizasiya dəyərlərinin gələcək nəsillərə ötürülməsi baxımından xüsusi aktuallıq daşıyır.
“Bu gün mədəni irs məsələsi yalnız tarix və mədəniyyət kontekstində deyil, həm də milli təhlükəsizlik, ideoloji dayanıqlılıq, humanitar diplomatiya və beynəlxalq əməkdaşlıq aspektlərində strateji əhəmiyyət kəsb edir. Qloballaşma proseslərinin sürətləndiyi müasir dövrdə milli-mənəvi dəyərlərin qorunması, tarixi irsin elmi əsaslarla tədqiqi və beynəlxalq səviyyədə təbliği dövlətlərin humanitar siyasətinin prioritet istiqamətlərindən birinə çevrilib”, – deyə rektor qeyd edib.
Anar Eminov diqqətə çatdırıb ki, dayanıqlı turizm anlayışı artıq təkcə iqtisadi inkişaf modeli deyil, həm də mədəni diplomatiyanın, milli irsin beynəlxalq miqyasda tanıdılmasının və regionların sosial-mədəni inkişafının mühüm istiqaməti kimi qiymətləndirilir. Onun sözlərinə görə, tarixi-mədəni irsin qorunması ilə turizm strategiyalarının uzlaşdırılması həm milli dəyərlərin yaşadılmasına, həm də regionların iqtisadi potensialının artırılmasına xidmət edir.
Rektor əlavə edib ki, Türk dünyasının zəngin ortaq irsinin beynəlxalq turizm marşrutlarına inteqrasiyası ümumi mədəni məkanın daha da möhkəmlənməsi üçün geniş perspektivlər yaradır.
O bildirib ki, Naxçıvanda keçirilən beynəlxalq konfrans çərçivəsində aparılan elmi müzakirələr, təqdim olunan tədqiqatlar və formalaşan akademik dialoq gələcəkdə universitetlərarası əməkdaşlığın genişlənməsinə, birgə elmi layihələrin həyata keçirilməsinə və ortaq humanitar düşüncə mühitinin inkişafına mühüm töhfə verəcək.
MDU-nun rektoru vurğulayıb ki, Naxçıvan Dövlət Universiteti ilə birgə təşkil olunan I Beynəlxalq Mədəni İrs və Dayanıqlı Turizm Konfransı universitetlərin strateji əməkdaşlığının, ortaq akademik baxışının və Türk dünyasının gələcəyinə yönəlmiş elmi-mənəvi məsuliyyətinin bariz nümunəsidir.
“Əminəm ki, qədim tarixə və zəngin mədəni irsə malik Naxçıvanda keçirilən bu mötəbər beynəlxalq konfrans yalnız elmi nəticələri ilə deyil, həm də Türk dünyasının ortaq mənəvi dəyərlərinin qorunmasına, mədəni inteqrasiyanın dərinləşməsinə və yeni nəslin milli-mədəni şüurunun möhkəmləndirilməsinə verdiyi töhfələrlə uzun illər yadda qalacaq”, – deyə Anar Eminov fikirlərini yekunlaşdırıb.
Bölmənin digər xəbərləri
