MƏCBURİ KÖÇKÜN RAYONLARINDAN OLAN YENİYETMƏ VƏ GƏNCLƏR ARASINDA SPARTAKİADA KEÇİRİLİR
AZƏRTAC xəbər verir ki, Yasamal Rayon Gənclər və İdman İdarəsi ərazidə müvəqqəti məskunlaşmış məçburi köckün rayonlarından olan yeniyetmə və gənclər arasında spartakiada keçirir.
“Yasamal” Sağlamlıq İdman Klubunda təşkil edilmiş spartakiadanın təntənəli açılış mərasimində Bakı Şəhər Gənclər və İdman Baş İdarəsinin rəisi Raqif Abbasov, Qaçqınların və Məcburi Köçkünlərin İşləri Üzrə Dövlət Komitəsinin əməkdaşı Sənan Hüseynov və başqaları çıxış edərək, yarış iştirakçılarına uğurlar arzulamışlar.
Natiqlər bildirmişlər ki, spartakiadanın keçirilməsindən məqsəd Prezident İlham Əliyevin ölkədə bədən tərbiyəsi və idmanın inkişafı ilə bağlı müvafiq sərəncamlarını gənclər arasında təbliğ etmək və onların fiziki hazırlığına təkan verməkdən ibarətdir.
Yarışlarda Laçın, Şuşa, Füzuli, Xocalı, Zəngilan rayonlarından olan 160-dan çox yeniyetmə və gənc mübarizə aparır.
Güllə atıcılığı, şahmat, dama, mini futbol, voleybol və digər idman növləri üzrə keçirilən spartakiadanın qaliblərinə kubok və xatirə hədiyyələri təqdim ediləcəkdir.
Bölmənin digər xəbərləri
