Media: Trampın inaqurasiya mərasiminə VIP biletlərin hamısı satılıb
Bakı, 9 yanvar, AZƏRTAC
ABŞ-ın yeni seçilmiş prezidenti Donald Trampın inaqurasiya komitəsi siyasətçinin andiçmə mərasiminə bilet satışını dayandırıb.
AZƏRTAC xəbər verir ki, “The New York Times” qəzetinin yaydığı məlumata görə, respublikaçılar bilet satışından 170 milyon dollardan çox vəsait əldə edib. Toplanan vəsaitin həcmi o qədər böyük olub ki, inaqurasiya fonduna on milyonlarla dollar göndərən bəzi sponsorlar VIP biletləri ala bilməyəcəkləri barədə məlumatlandırılıb.
Komitənin müəyyən etdiyi şərtlərə görə, 1 milyon dollar ianə köçürən və ya 2 milyon dollar toplayan şəxs altı tədbirə, o cümlədən Trampın andiçmə mərasiminə, həmçinin prezident və xanımı ilə ziyafətə altı bilet qazanır.
Siyasətçinin komandası 2017-ci ildə Donald Trampın ilk prezidentlik müddəti üçün inaqurasiya mərasimində bilet satışından 107 milyon dollar əldə etmişdi.
Xatırladaq ki, noyabrın 5-də ABŞ-da keçirilən prezident seçkilərində inamlı qələbə qazanan Donald Trampın andiçmə mərasimi 2025-ci il yanvarın 20-nə planlaşdırılıb. Respublikaçılar, eyni zamanda, Senata nəzarəti ələ keçirməyə, həmçinin Nümayəndələr Palatasında çoxluğu qoruyub saxlamağa nail olub.
Bölmənin digər xəbərləri
