MƏKTƏBLƏRDƏ İQTİSADİYYATIN TƏDRİSİ DƏSTƏKLƏNİR
AZƏRTAC xəbər verir ki, sentyabrın 27-də “Caspian Plaza”da ABŞ Beynəlxalq İnkişaf Agentliyi (USAİD), Şevron Xəzər Ltd. və “Statoil Hidro” şirkətləri arasında anlaşma Memorandumu imzalanmışdır.
Memorandum 2008-2010-cu illərdə Azərbaycanın 230 orta məktəbində “Junior Achievement” gənclər təşkilatının keçirdiyi “Məktəblərdə iqtisadiyyatın tədrisi” proqramının maliyyələşdirilməsini nəzərdə tutur. Proqram orta məktəblərin 300 müəllimi və minlərlə şagirdinə sahibkarlıq, biznesin təşkili, maliyyə və idarəçilik sahələrində ilkin biliklərə yiyələnməsini təmin edəcəkdir.
Tədbirdə USAİD-in Azərbaycan üzrə əlaqələndiricisi Skott Teylor, “Statoil Hidro”nun vitse-prezidenti Olav Skalmeraas və Şevron Xəzər şirkətinin ölkə üzrə meneceri Bob Dastmalçı çıxış edərək sözügedən proqrama dəstək olmalarından məmnunluqlarını ifadə etmişlər.
Proqram barədə məlumat verən “Junior Achievement” təşkilatının icraçı direktoru Vusal Xanlarov bu layihənin ilk mərhələsinin 2003-2008-ci illərdə respublika üzrə 26 rayondan 230 məktəbi əhatə etdiyini bildirmişdir. Hazırkı mərhələyə isə USAİD 72 min 631, “Statoil Hidro” 87 min, Şevron Xəzər Ltd. isə 50 min ABŞ dolları vəsait ayrımışlar.
Bölmənin digər xəbərləri
